Tukin khan Lawngtlai Horticulture Division hnuaia Lawngtlai Chandmary venga pack house cum market shed siam thar chu AH & Vety Minister Pu C. Ngunlianchunga’n a hawng a. Kut hna thawktute hnenah Lawngtlai Horticulture Division-in an kui sa purunsen, tomato leh zikhlum tiak a sem nghal bawk.
Pu C. Ngunlianchunga chuan thei leh thlai ei tam hi hrisel nan a tha a, a hrisel, tharlam leh thianghlim ei theih phei chu a tha leh zual a ni tiin, kut hna thawktute thlai thar chhuah thianghlim zawk leh felfai zawka zawrh chhuah theihna tur hmun Horticulture Department-in an ruahman chu hmasawnna lawmawm tak a nih thu a sawi a. Kut hna thawktute’n an thawh rah manhla zawka an seng theihna turin an thar chhuahte hralhna tur hmun tha siamsak mai bakah, an thar sate a chhiat mai loh nana dah thatna tur (cold storage) tha tak te pawh din ve theih thuai chakawm a tih thu a sawi. Kut tling lova sum lak luh leh zawmthaw taka hna thawhah malsawmna dawn tur a awm lo tiin, sawrkar hna thawk emaw kut hna thawk mi emaw paw’n mahni hma zawn theuhvah ram hmasawn nan thlantui fara hna thawh a tul a ni, a ti a. Mite tan malsawmna kan nih theih loh pawha a kalkawng tal nih tum turin kal khawmte chu a chah nghal a ni.
He hun hi Lawngtlai Divisional Horticulture Officer (DHO) Pu L. Lalhmingmawia Pachuau MHS chuan kaihruaiin, pack house sak a nih dan leh an ruahmanna te a sawi zau va. Market shed hmun leh in neitu lam atangin Rev C. Vanlawma’n hunserh hmangin, Pu Thathluna Chinzah chuan thu a sawi a. Horticulture Development Officer Pu Hunlawmawma MHS chuan lawm thu sawi bawk.
He pack house cum market shed hawn tak hi Mission for Integrated Development of Horticulture (MIDH) scheme hnuai atanga sak niin, thei leh thlai thar zuartute’n thianghlim leh tuihnai zawka an thil neihte an zawrh theihna tura ruahman a ni a. A in hi mimal in ding sa, bazar atana hman lai mek niin, MIDH atang hian Horticulture department lam chuan chei hnumin, thianghlim leh enkawl nuam zawk ni turin an buatsaih a ni.
Tukina pack house cum market shed hawnnaah hian Lawngtlai East Bialtu MLA Pu H. Zothangliana leh LADC CEM Pu T. Zakunga te bakah, LADC-a Executive Member leh MDC te, state sawrkar hnuaia department thenkhat hotute, chanchinbumite leh Horticulture department-a thawktute an tel a. Hun hman zawh hian Pu Thathluna Chinzah te chhungkuain chawhlui an buatsaih chu an kil ho nghal a ni.
