Nimin Ni 29.4.2015 khan Minister of State for DM&R Pu C. Ngunlianchunga leh a mah tawiawmtu Pu H. Zothangliana, Parliamentary Secretary for Art & Culture chuan Lawngtlai West Constituency chhunga Model Village atana a thlan Vathuampui khua an tlawh a, hmasawnna hnathawh hrang hrangte a en bakah Health Camp leh Awareness te neih a ni.

Lawngtlai West bialtu Pu C. Ngunlianchunga chuan Mizoram sawrkar in thingtlang kilkhawr zawkte a ngaihthah lova, khaweng an hmuh theih nan chawl lovin a thawk reng zawk a ni. Hmasawnna hnate hi a rawn kal zel dawna, tha taka thawh a nih theih nan mipuite tawiawmna a pawimawh em em a ni. Vawiina Vathuampui hmasawnna hmel thar a hmuhte ah hian ka lawmpui em em che u a, tangkai taka in hman zel ka duhsak che u a ni a ti a, faina lamah tan la turte, ramngaw humhalh nasa zual deuh deuh turte, NLUP leh eizawnna dang danga hmasawn zel tura bei sauh sauh tur tein mipuite chu a hrilh a, zirlai naupangte chu zirna thlahthlam hauhlo turin a fuih bawk.

Pu H. Zothangliana pawhin thu sawiin Vathuampui mipuite chu hmasawnna an hmuh nasat avanga a lawmpui thu sawiin, khaw vannei, remchanna ngah, hmasawn zel tura dinhmun thaa ding an nihna chu hmang zui thiam turin a fuih a ni.

Pu C. Ngunlianchunga hian MLA Local Area Development Fund atanga Rs. 500000 senga sak Pang Zirlai Pawl General Headquarters Office chu a hawng a, hemi hnu hian AH & Vety Department in an sak thar Rural Animal Health Centre (RAH) chu a hawng leh a, chumi dawtah Pu H Zothangliana chuan Vathuampui khaw mipuiten Pu C. Ngunlianchunga chawimawina lung an phun chu a hawng leh a, hemi zawh hian Rural Development lamin Playground an laih mekna hmunah vantlang inkhawm buatsaih a ni. Minister hian zing karah BADP sum senga sak mek Vathuampui Guest House a tlawh bawk.

Hengte bakah hian Vathuampui leh a chhehvel khaw mipuite tan AH & Vety Department chuan Joint Director Dr. Saingura hovin Animal Health Camp & Free Clinic an buatsaih a, Lawngtlai DVO Dr. Lalnunhlima Ralte leh Doctor engemawzatin ran damlo 2904 zet an en a ni. Chutiang bawkin Health Department, Lawngtlai District chuan Chief Medical Officer Dr. HC Thangkima hovin Malaria Free Clinic & Awareness Campaign neih a ni bawk a, mipuite chu Malaria natna kai theihna laka inven dan chipchiar taka zirtir an nih bakah damlo 270 zet te chu enfiah an ni bawk. Heng free clinic ah te hian Vathuampui mai bakah a chhehvel khuate atangin inentir tur mi engemawzat an kal khawm a ni.

Vathuampui khua hi Lawngtlai atanga chhim thlang lam km 148 a awm niin chhim lam ramri hnaiha khaw pawimawh berte zing a mi a ni a, tunah hian chhungkua 246 awmin mihring 1250 vel an cheng mek a ni.

Pu C. Ngunlianchunga leh Pu H Zothangliana te hi Lawngtlai Bawrhsap Pu J Hmingthanmawia te; Project Director DRDA, Pu Dolianbuaia leh official dangte bakah LADC mi pawimawh ten an tawiawm a ni.

Attachment

  • Loading attachment...