Thisen cancer avanga Kolkata Appollo Hospital-a nimin zinga boral ta, Pu Chawngtinthanga, Parliamentary Secretary ruang chu vawiin khan Lengpui Airport-ah ropui taka lo hmuah thlen a ni. A ruang lo hmuaktute zingah hian Chief Minister Pu Lal Thanhawla te nupa bakah Aizawla awm Minister zawng zawng, Speaker, Parliamentary Secretaries, Officials leh mipui thahnem tak an tel a ni.

Pu Chawngtinthanga ruang, kuanga dah chu Airport Terminal bula vantlang hahchawlhna hmunah zalhin, ama puala hun hman a ni a. He hun hi Pu K.Lalnghinglova, IAS, Secretary, Education in kaihruaiin Pu Lal Thanzara, Parliamentary Secretary in report a pe a. Pu Lal Thanzara chuan Chief Minister tirha Pu Chawngtinthanga leh Minister Pu S.Hiato fapa kan tura Kolkata a kal an nih thu sawiin, an thlen tirh chuan Pu Chawngtinthanga chu hlim hmel a put thu leh harsa chung pawhin ala tawng peih a ni a ti a. Amaherawhchu a hniam chak thu leh, nimin Chawlhni a rawn haw san a tum pawh a dinhmun a ngaihtuahawm avangin a thulh phah a ni a ti. Pu Chawngtinthanga boral chungchangah Kolkata Mizo awm te fakawm a tih thu leh buaipui ngai turte pawh anmahni vekin tiin, nizan vek khan a thlahna hun te pawh neih ani a ti. 

Pu Lal Thanzara report zawh hian chhungkaw lam atangin thusawina neih a ni bawk a. Hunserh hman a ni bawk a ni.

Naktuk hian Pu Chawngtinthanga vuina hi hman a ni ang a. Sorkar lam atang chuan a vuina hi chawhma dar 11 leh 12 chhunga neih a ni ang a, hetah hian Chief Minister, Speaker leh Law Minister ten thusawina an hmang ang a, sorkarin a sunna, obituary Chief Secretary in a chhiarchhuak bawk ang.