Vawiin hian MP Lok Sabha Pu C.L. Ruala leh bialtu MLA, Minister of State Pi Vanlalawmpuii Chawngthu te chuan Mizorama SAGY Model Village hmasa ber Khawlailung khuaa tui Pump thar te, vengchhung inkalpawhna PCC Pavement thar te, leh National Institute of Electronics & Information Technology (NIELIT) Study Centre thar te hawnna hun an hmang.

Heng hmasawnna hna thar hrang hrangte lawmna inkhawm, Khawlailung Community Hall a neih ah Pu C.L. Ruala chuan, Model Village-a thlan dawnin khawi khua hi nge inlungrual anga, Model Village thiltum tihlawhtling thei tura tangrual ber ang, tih a ngaihtuah thu leh Khawlailungin chu chu an tlin ber a rin avanga thlang a nih thu a sawi a. Sawrkar hmalakna leh hmasawnna thil tinreng neitu nihna rilru pua kalpui thei khawtlang mipui kha Model village in a mamawh avangin he khua hian a tih theih ka ring ani, a ti a. Mipuiten khawtlang hruaitute kan thawhpui thiam tlat avangin tunah chuan khaw nuam leh hmasawn tak kan lo ni ta a, kan VC te pawh Serchhip District a VC tha bera thlan a lo ni ta hial a ni, a ti bawk. Khawlailunga hmasawnna thar thenkhat Bank te, Market Shed te, NIELIT Study Centre leh thil dang dang a awm theih nana hma a lakna tlangpui a sawi a. Mipuiten thawhkhawma veng inkalpawhna te, tui pump khawlte leh thil dang dang siam nachang an hria chu an chhuanawm hlea a hriat thu te sawiin, vawiina khawtlang thawhkhawma lei tui pump te phei chu kan nitin nun nena inzawm tlat thil a nih avangin a hlu em em ani, a ti. IT tel lovin mihringte nun khuain hma a sawn mawh ta hle a,  Computer zirna hmun tha ngaihtuah nachang hria hruaitute, bialtu Minister te in nei hi in vannei hle a. A hmanraw leina tur tam lutuk lo MP Fund atanga lo pek a, tangkai taka Khawlailung mipuiten in lo hman dawn si chuan, ka tan thil tih nuam tak ani awm e, a ti. Heng thil hrang hrangte a hlawhtlin theih nana thawktu Department hrang hrangte chungah pawh lawmthu ka sawi ani, a ti bawk. 

Bialtu MLA leh Minister of State ni bawk Pi Vanlalawmpuii Chawngthu pawhin thusawina hun hmangin, a bial chhunga hmasawnna hna tam tak hmuh tur awm chu lawmawm a tih thu sawiin, faina lamah leh tuilak hna thawh kawnga nasa taka beitu PHE Department chungah lawmthu a sawi a. SAGY Model Village atana Khawlailung thlangtu MP Pu C.L. Ruala chungah lawmthu sawiin a zarah Khawlailung chu nasa taka a than thu a sawi a. A bialtu a nih ve atanga vawiin thlengin Khawlailungah hian hmasawnna pawimawh tak tak hna sawmriat pasarih (87) zet thawh tawh ani, a ti.  NIELIT hote inpekna zarah a bial chhunga a pahnihna tura Study Centre thar hawn ani leh ta chu a hlim hle a ni tih sawiin nikum hmasa lawka he Centre N. Vanlaiphaia hawn tawh pawh mipuiten an chhawr tangkai hle ani, a ti a. Khawlailung mipuite pawhin an hmang tangkai ang tih ka ring tlat ani, a ti bawk. Mipuite thawhpuina lo chuan Minister, MLA leh sawrkar hnathawkten hna an thawk tak tak theilo tih sawiin a bial chhunga hmasawnna tam tak a awm chhan chu mipuite thawhpuina tha a dawn tlat vang a nih thu a sawi a. A bial mipuite hnenah lawmthu sawiin an thawhpui zelna a dil bawk a ni. 

Vawiin hian National Rural Drinking Water Programme (NRDWP) 2016-17 hmanga tui dahkhawlna sak thar pahnih inkara tui pump na tur khawl, khawtlang mipuite thawhkhawm Rs. 14 lakh vel leh Environment, Forest & Climate Change Department tena an puihna Rs. 2 lakh a vaiin Rs. 16 lakh vel hmanga an lei, darkar khata tui litre 15,000 pump thei khawl leh a in (pump house) PHE Department ten an sak sak chu  Pi Vanlalawmpuii Chawngthu in a hawng a. He mi hnu hian MP Fund, Rs. 15 lakh senga siam 1.32 kms a thui veng chhung inkalpawhna PCC Pavement chu Pu CL Ruala'n hawng ve leh in, a hnuah Pi Vanlalawmpuii Chawngthu in MLA Fund Rs. 3.75 lakh a pek senga sak Khawlailung T. Section YMA Hall sak thar an tlawh leh a. Tin, Khawlailung khaw chawmtu tur dahkhawmna Tank, 3.2 lakh Litres dawng, NRDWP sum hmanga sak thar chu tlawh lehin he mi hnu hian Khawlailung Bazar a MP Fund hmanga NIELIT Study Centre sak thar chu MP Pu CL Ruala hian a hawng leh bawk ani. NIELIT Khawlailung Centre a hman tur bungrua, mi 15 tana Computer zir theihna tur (system) hi MP Pu CL Ruala hian MP Fund hmanga tum sakin, thawktu leh thawktute hlawh erawh chu NEILIT lamin an tum thung dawn a ni. Tunah hian mi 30, zingah 15, tlaiah 15 ten CCC Course an zir tan tawh nghe nghe a ni. Vawiina MP Pu CL Ruala leh Pi Vanlalawmpuii Chawngthu ten Khawlailung an tlawh hi Pu Lalrinliana Sailo, MLA pawhin hun engemaw chen a tel puia, a hnuah Champhai lam a pan san ve leh ta a ni. 

Heng thil thar hrang hrangte an hawn zawh hian a lawmna inkhawm hi Khawlailung Community Hall ah neih zui ani a. A lawmna inkhawm Pu Thangbawiha, VCP Khawlailung kaihhruaiah hian VC Secretary Pu Lalnunhlua'n vawiina hawn thar tak hote report tlangpui a pe a. Heng hmasawnna thar te a awm theih nana theihtawp chhuah tu Pu CL Ruala MP, Pi Vanlalawmpuii Chawngthu, bialtu Minister, khawtlang mipui te leh Department hrang hrangte chungah lawmthu a sawi ani. 

Pu Samuel Ralte, SDO, PHE, E. Lungdar pawhin thusawina hun neiin vawiina hawn tak tui pump thar hmalakna report a pe a. NRDWP atangin Model Village tan bik hian Rs. 172 lakh hmuh a ni hlauh mai a, chu chuan tuilak te, a dahkhawlna tank te leh khawchhung semdarhna te thawh ani ta a. Khawlailung semdarhna (distribution system) hi kan rama   a tha ber pawl niin in tin hian connection point hi metres 50 aiin an hlat lo theuh ani a ti. Tuna tuilak hi chhuk luan (gravity) in ram atangin an khaw daiah thlen ani phawta, khawdai Tank atanga khaw chung Vai tlanga tui dahkhawlna tank a dahchhohna tur hi pump a ngaih tak avang leh sawrkar atanga fund a awm rih siloh avangin khawtlangin an thawhkhawm ta a ni. Khawlailung tuilak hmasaah khan mipakhatin nikhatah tui litres 13 dawng thei ang an ni a, he tuilak tharah hi chuan mi pakhatin nikhatah tui litres 38 ang zel an dawng thei tawh dawn ani, a ti bawk. Tin, he hunah hian NIELIT lam atangin Pu Lalrempuia Sailo pawhin thusawina hun neiin an hmalakna tlangpui a tarlang a. Khawlailung khawtlang chu vannei a tih thu sawiin Aizawla NIELIT hmuna CCC zir tura miin Rs. 4750 zet an sen laiin Khawlailung thalaite chuan a thlawn vekin an zir thei bik dawn ani, a ti. 

Vawiina hmasawnna thar hawnna inkhawmah hian khawtlang mipuite an kal tha hle a ni.