1808/2023-2024

LUNGLEI; the 8th September,2023: Pu C.Lalnunkima, Director, Information & Public Relation Department chuan vawiin chawhnu khan District Information Office Lunglei tlawhin, Office thawktute leh Lunglei MJA memberte nen inkawmhona hun an hmang.

Inkawmhona hun hi Pu N. Vabeiratlua,Deputy Director, Lunglei DIPRO chuan kaihruaiin, I&PR Director Pu C.Lalnunkima chuan thusawina hun a hmang a.Lunglei chu kum 30 dawn lai a hmuh tawh loh thu leh khawpui thang tak nia a hriat thu sawiin, Information Department Lungleia thawktute leh MJA member te nen inkawmhona hun tha tak an nei thei chu lawmawm a tih thu a sawi. Pu C. Lalnunkima chuan MJA hi Information & Public Relations Department tichaktu pawimawh tak an ni tiin, Lungleia DIPRO office pawh tha taka an lo thawhpui tawh thin avangin lawmthu sawiin, tuna DIPRO thar leh staff te pawh theihtawp chhuah a lo thawhpui zel turin MJA te chu a sawm a. Information & Public Relations Department chu amah ringawtin a kal theilo a, mipui leh sawrkar rawngbawlna kawngah MJA te nen thawhhona tha tak an neih zel a pawimawh hle tiin; hun lokal zel turah pawh MJA te nen thawhhona tha tak neih zel a duhthu a sawi bawk a ni.

He hunah hian Pu Laltlanthanga, Lunglei MJA President pawhin thu sawiin, Director in Lunglei MJA te nen inkawmna hun tha tak Lunglei hmun ngeia a buatsaih chu lawmawm a tih thu sawiin, Information & Public Relations Department chu MJA chuan a intineitu hle a ni tiin; an theihna zawnah chuan Information & Public Relations Department nen thawhhona tha tak neih zel an tum thu a sawi. MJA Lunglei member dang te pawhin thu sawina hun hmang hlawmin; MJA welfare chungchang bakah DIPRO office leh quarters tana an thil vei zawng hrang hrang te Director hnenah an thlen hlawm a ni.

Director Pu Lalnunkima hian DIPRO Office bakah DIPRO’s Quarters dinhmun a enfiah nghal bawk a ni. Director hi Aizawl atangin Pi Mina Zoliani, Dy. Director I&PR chuan a lo tawiawm a ni.