No.3537/2021-2022

Aizawl the 2nd January, 2022 : Ni 31 Dec, 2021 zan khan TNT chuan 'TNT Family Night with Christ' an hmang a, Lok Sabha MP Pu C. Lalrosanga chuan khuallian niin a hmanpui.

He hunah hian thu sawiin Pu C.Lalrosanga chuan hun tawn mek zelah hian hma lama thil awmte chunga tiam chin lam pan ṭalh ṭalh tur a nihzia a lang a, hringnunah harsatna a lo thleng a, chu chuan chhungkua, khawtlang leh ram a khawih a, hripui Covid-19 ngei pawhin TNT-ah engemaw chen chu nunphung tibuaipui thin mahse Pathian chhanchhuahna mak tak mai an dawn thin avangin a lawmawm em em a ni, a ti. Tun hma thil thleng, tlakchhamna emaw hlawhchhamna tawhna emaw te theihnghilh leh kalsan a, hmalam eng zawk ena kal turin TNT-a awm zawng zawngte a sawm a. Kum 33 lai mai TNT a lo ding tawh a, Pathian kaihhruaina in hei leh chen hi Pathian rawngbawlna ropui tak mai TNT kaltlangin hmuh a ni ṭhin a, thil mak tak takte pawh a thleng thin chu ropui a tih thu leh TNT dintu leh hotupa Pu Sangthankima a ngaihsanawmin, khawvelah mihring zingah lawmman pek tur thlang dawn se, a pek hmasak ber turte zinga mi a ni, a ti. He TNT hmun ropui tak hi dinchhuahin a lo awm ta a, mi tam takin thlarau, rilru leh taksa lam damna te, malsawmna te an lo dawn phah nan hmang zel turin duhsakna a hlan a ni.

MP Pu C. Lalrosanga chuan TNT De-adiction centre hmun tihzauha a ṭulna hmuna lungrem sak a tum thu a sawi rualin TNT ṭanpuina pawisa fai Rs. 30000/- chu Dr. Sangthankima hnenah a pe nghal a ni.