Pachhunga University College chuan vawiin khan an college Multipurpose Complex Auditorium-ah zirlai lut thar te lawmna ‘Freshers' Social’ leh zirlai tithate lawmpuina ‘Felicitation Function’ an hmang.

Freshers' Social-ah hian College Principal, Dr.Tawnenga chuan zirlai lut thar te lawmna thu sawiin, college leh anmahni tan an theih tawp tha ber an beisei thu  leh Zirlaite chu pass mai duh tawk lova, thiamna tak tak nei tura zir turin a chah a. An thiamna pawh mahni tan mai ni lo, midangte tana chhenfakawm taka hmang thei tur leh college thupui 'learning and service' chu hre reng tura  chah  in Zirna tha awm tur chuan thawhhona tha a pawimawh tih Principal chuan sawiin, 'Unity is our strength' tih hi kan hre reng tur a ni' a ti bawk.

Zirtirtu aiawhin Dr. Lalzama, HoD, Department of Mizo chuan thu a sawi bawk a ni.

PU College-ah hian zirlai lut thar (Freshers) Arts-ah 506, Science-ah 386 leh Commerce-ah 62, an vaiin 954 an awm a, III semester leh V semester te nen chuan zirlai zawng zawng hi 2387 an ni.

Freshers Social an neih rual hian, Mizoram University hnuaia Under Graduate Examination Result, 2017-a an college atanga pass chhuak thar te lawmpuina (Felicitation) programme an hmang bawk. MZU result chhuakah khan PU College zirlai hi Arts-ah 72.45% an pass a, Science-ah 60.82%, Commerce-ah 80.95% an pass a. University pumpuiah subject topper 23 zinga 15 (65.2%) leh subject hrang hranga rank holder ni thei 216 zinga 109 (50.46%) chu PU College zirlaite an ni.

PU College atang hian Gold Medalist 2 an awm a, Arts stream-a mark hmu sang ber Lalmawizuali, Department of History hnenah 'H.K.Bawihchhuaka Award' hlan a ni a, Commerce stream-a mark hmu sang ber Brian Laldinsanga hnenah 'Khawtinkhuma Award' hlan niin Science stream-a mark hmu sang ber Vanlalhriatsaka, Department of Statistics hnenah 'Lenrualhlui Award' (PUC Allumni Association) hlan a ni. Heng bakah hian tumruhna nena zirchhuak R.Lalrammawii, Department of Sociology hnenah 'Special Award 2017' hlan a ni bawk.

Rank holder te hnena chawimawina pek rual hian department tinah an zirlai tithate hnenah lawmpuina thil pek an pe a. Heng zingah hian an College Vice Principal kalchhuak ta, Prof. J.V.Hlunan History Department hnena Rs. 1,00,000 a pek hmangin History department chuan an zirlai tithate hnenah thil pek an pe a ni.

Pachhunga University College-ah hian department 21 awmin zirlai 2387 an awm mek a, zirtirtu nghet 103 leh thawktu dang 100 chuang zet an awm bawk.