Vawiin chawhnu khan Trade & Commerce Department enkawltu Minister Pu H. Rohluna leh Parliamentary Secretary Pu Joseph Lalhimpuia hovin New Secretariat Conference Hall-ah Assistance to States for Developing Export Infrastructure and other Allied Activities (ASIDE) Scheme hnuaia hnathawh hrang hrangte thlirletna meeting neih a ni a. Meeting-ah hian Trade & Commerce Department, Bamboo Development Agency, MIFCO leh ZOHANDCO aiawh ten ASIDE Scheme hnuaia an hmalakna leh hnathawh kal lai mek, thawh chin power point presentation hmangin an tarlang a ni.

Pu H. Rohluna chuan hmasawnna hna reng reng chu langtlang taka kalpui a tul thu sawiin hna reng reng, a bik takin hmasawnna ruhrel ang chi hi chu vil uluk a ngai lehzual a, a vil zuina lam te kan ngaihpawimawh hian hna quality a tha thin chuvangin monitoring lamah kan tan a ngai a ni a ti.

ASIDE Scheme hnuaia hian Trade & Commerce Department chuan Vaiphai, Farkawn leh Sangau ah te Border Trade Centre sak hna te; Export Terminal Market Complex, Khawzawl hna te leh Development & Facilitation of Orientation programme on export infrastructure and allied activities hna te a kalpui mek a. Bamboo Development Agency hian Export/Import Business Training Centre for Entrepreneurs, Zuangtui; Bamboo & Wood Park for Export, Zamuang leh Skill Development Training Centre for Export, Lunglei te hi an kalpui mek a. MIFCO leh ZOHANDCO pawhin ASIDE hnuaia project an kalpui mek bawk a ni. Sawrkar Laipui hian 2014 -2015 chhung atan ASIDE sheme hnuaia hna kalpui mekte thawh nan cheng nuai 430 ruahman atangin cheng nuai 215 chu an released tawh a ni.