Vawiin hian Lawngtlai Central YLA Hall ah Lai Student Association (LSA) chuan General Conference vawi 25 na an hmanga, Parliamentary Secretary for Higher & Technical Education, Pu H. Zothangliana chu khuallian a ni.

Pu H. Zothangliana chuan zirlai kalkhawmte chu, State sawrkar leh Council sawrkar a hmelhriat Politician te behchhana hna hmuh tum mai mai chi an ni ang tih a hlauh thu hrilhin anmahnia Pathianin chakna leh theihna a dahte haichhuak a, khawvel huapa mithiam nih tum zawk turin a fuih a. Mizoram chhehvela laifate thlen chin leh dinhmun thlirin khawvel hmaa zahpuiawmloh kan ni thei a ni tih hi rin tlat tur a ni, a ti.

Pu H. Zothangliana chuan Lawngtlai District in hma a sawn zel theih nan Mizoram sawrkarin theihtawp a chhuah a ni a ti a, kawngpui tha tak kan neih theih nan te, zirna in changtlung zawk kan neih theih nan te, Damdawi In tha zawk kan neih theih nan te, tui intur thianghlim kan hnianghnar theih nan te, power supply ah hma kan sawn theih nan te hna thawh mek a ni tiin hmasawnna hnathawh mek chi hrang hrangte a tarlang a, reiloteah heng te hi a takin kan chhawr thuai dawn a ni a ti bawk.

LSA General Conference nikhatna hi LSA Vice President Mc. Lalhuappuia’n a kaihruai a, President Pu K. Thansiama’n thu tawi sawina hun a hmang a, Centre for Promotional and Technical Education, Mizoram Centre ten hun an hmang bawk. Conference hi naktuk thlenga hman tur a ni a, naktukah hian kum 2015-2017 chhunga an pawl hruaitu turte an thlang dawn a ni.

Lai Student Association hi kum 1958 ah Shillong ah Regional Student Association tih hming pua din a ni a, kum 1975 ah Lai Student Association tia a hming thlak niin, tunah hian member 15000 vel an nei mek niin General Secretary Pu N.T. Lalmuanzuala chuan a sawi.