Vawiin khan Lawngtlai District Village Council Association General Conference; Lawngtlai Central YLA Hall a neih ah Parliamentary Secretary for Art and Culture Pu H. Zothangliana chu khuallian niin a hawng.

Khuallian chuan District chhunga Village Council a hmeichhe member te chu fakin a chhuang tak zet a ni tih a hrilh a, khawtlang tana hriselna lam hawi te, faina leh thianghlimna te leh zirna lamah te leh kawng hrang hrangah theih tawpa tan la turin a fuih. Sawrkar in Lawngtlai District chhunga hmasawnna hna tam tak a thawhte kan lo chik lovang tih ka hlau va, kum 10 kal ta vel atanga hmasawnna hmel thar kan hmuh ringawt pawh hi a tam tham hle a ni a ti.

Sawrkar inrelbawlna lamah District Information Office te chu mumal zawka kalpui a lo ni ta a, District Research Office hawn thar a ni a, District Fisheries Development Office hawn thar niin, Chief Judicial Magistrate pawh neih thar a ni a, PWD Office pawh a thara sak tawh niin tunah pawh thawh mek reng a ni. Thingkaha Mini DIET ni thin kha tunah chuan DIET puitlingah hlan kai a ni a, Thingkahah vek hian tunah 3rd IR awmna hmun tur leh kan la hmelhriat lutuk loh zirna in pawimawh tak Polytechnic hmun turte chak taka sak mek an ni. Greater Lawngtlai Water Supply Scheme te pawh harsa tak chhungin sawrkar in min siam sak mek a, kuminah chuan Tuipui tui, tih thianghlim sa ngei in hman kan beisei a ni. Tin tunah hian Health Worker Training Centre chu sak mek a ni bawk a, reiloteah zawh thuai beisei a ni. Lawngtlai mipuiten kan mamawh em em Power & Electricity Division puitling pawh Chief Minister chuan min approved sak tawh a, sawrkar kalphung angin bawhzui chhoh zel a ni anga a taka hmuh ni a awm thuai ang. Tin Lunglei to Lawngtlai kawng thuam that hna pawh tunah Contractor ten kut an thlak tan tawh bawk a ni. Hengte bakah hian hmasawnna hna District chhunga thawh mek tam tak sawi tur a la awm a hengte hian Lawngtlai District hi ngaihthah kan nih loh zia a ti chiang hle a ni a ti.

Parliamentary Secretary chuan sawrkar a that em avangin mi tam tak kan nung thiam tawh mang lova, kan mamawh te sawrkar hnen atanga a dawna dawn tumna rilru in min tibuai hle mai, hei hi kan paih bo a ngai; thawhchhuah nei, ram hmasawnna tura tha thawhtu ngei nih kan tum zawk tur a ni. Khawtlang hruaitu kalkhawmte hian chu rilru chu hawnin a zirtirtu leh entawn tura hmahruaitu nih tum theuh ang u a ti bawk.

Lawngtlai District VC Association Conference ni khatna hi Vice President Pu T. Rualkhuma’n a kaihruai a, khual zahawm Pu Ngentluanga, Sr. Executive Engineer, PHE in thu a sawi bakah Dr. H. Laldinmawia, State Co-Ordinator, SIRD Mizoram in “ Leilung hausakna enkawl dan leh chumi kawnga VC te mawhphurhna” tih thu a sawi chu zirho nghal a ni bawk. He hunah hian District chhung VC member te an kal tha hle a ni.

Attachment

  • Loading attachment...