Vawiin chawhma dar 11:00 khan Pu Hiphei, Speaker, Mizoram Legislative Assembly hovin Siaha District Planning Committee Member ten BRGF( Backward Region Grant Fund) hnuaia hnathawh tur leh 2015-2016 atanga BRGF tihtawp (delink) a nih tak avanga hmalakna tur siamrem leh her rem ngai te thlir hova, rel ho turin meeting an nei. He meeting-ah hian BRGF hnuaia Kum 2014-2015 tana sum Sanctioned kumin 2015-2016 a dawn; cheng vaibelchhe 11.43 hmanga hnathawh tur chungchang huangzau taka sawi hova, ruahmanna siam a ni. BRGF hi 2015-2016 atanga tih tawp tawh a nih avangin, 2013-2014-a fund hmuh atanga hnathawh kalpui mek pam tul tur a awm nual avangin, 2014-2015 hnuaia hna thar leh hmalakna thar tur (New work) atana sum sanctioned thenkhat te chu, hna kal pui mek (Ongoing works) thawh zawh nan; herhrem leh siamrem dan te a awm em tih vawiin DPC meeting hian a ngaihtuahin a rel dawn a ni.

Speaker Pu Hiphei hian a bial (Palak constituency) chhunga khawthlang lam khua te fang turin naktuk zing dar 10:00 hian Siaha a chhuahsan ang a, Ni 2/11/2015-ah Siaha-ah let lehin, a tuk ni 3/11/2015-ah M.S.O. Gen.Hqrs ten an Golden Jubilee lawmna Programme an buatsaih chu khuallian niin a hmanpui ang a, Ni 4/11/2015 –ah Aizawl panin a haw leh dawn a ni.