Mizoram State Sports Council chuan vawiin khan  Hyderabad-a 2nd National Cadet Taekwondo Championship neih taka kal Mizoram Taekwondo team Silver medal 1 leh bronze medal 3 nena lo haw lawmpuina Sports Council Office, Khatla ah an nei a, Parliamentary Secretary Pu Hmingdailova Khiangte in a hmanpui.

Medal lawmna ah hian  Pu Hmingdailova Khiangte khuallian chuan, kan awmna a kilkhawr em avangin Mizote tan infiamna khawvelah harsatna thuahhnih kan tawk a, tun hnaiah inkalpawhna leh inbiakpawh theihna te a that tak avangin kawng tam takah  harsatna zualpui chu kiang tawh mahse heti chung hian India rama lang phak tur chuan harsatna tam tak hmachhawn tur a la awm a ni a ti a. Nasa takin Sports lamah hmasawn mahila, lehkha zirna  thlahthlam tur a nih loh thu leh Education leh Sports hi thil kalkawp tlat a nih avangin hlawhtling tur chuan tumruhna leh huaisenna  neih a ngaih thu a sawi.

Sports Association hruaitu buaipui ngai khawpa che fel lo an awm fo thin thu leh hengte hian hmasawnna turah min ti thuanawp thei a, nasa taka kan thawhrim a ngai a ni tiin Pu Hmingdailova chuan Mizoram Taekwondo team chu an fehchhuah leh hunah medal hlu zawk gold medal nen ngeia lo haw tawh tura duhsakna hlanin a fuih nghal a ni.

He hun kaihruaitu Pu C. Laltlanthanga, Secretary, Mizoram State Sports Council chuan MSSC-in Hawla Indoor Stadium-ah mipui tan man tlawm zawka Gym leh Physiotherapy te an hawn tawh thu leh State aiawh tur player te tan man chawi lova a hman theih thu a sawi a, Mizoram chu India rama Sports Doctor nei thei State tlemte zinga a tel tak thu a sawi bawk.

July 30 atanga August 1, 2015 chhung khan Andra Pradesh khawpui Hyderabad-ah 2nd National Cadet Taekwondo Championship neih a ni a, he championship-ah hian Mizoram chuan a vaiin medal 4 - silver 1 leh bronze 3 an rawn hlawh chhuak a ni.

MSSC chuan a tih thin danin Mizoram tana medal latute bakah coach leh mamanager te hnenah hian lawmpuina thilpek a hlan leh a ni.