Nimin khan Pu Hmingdailova Khiangte, Parliament Secretary, Tuirial Bialtu MLA ni bawk chuan Zanlawn leh Lungdai a tlawh a. Sawrkar hmalakna tur leh hma lak mekna thenkhat te a hmunah a tlawh.

Bialtu MLA chuan, Zanlawn-a RMSA Secondary School thar tlawh in, Khawtlang hruaitute leh zirtirtute nen hmalakna tur an en a. School panna kawngpui a that lo avangin, Bangla kawng hlui chho chu chei that tura sawrkar-ah hmalak nise anti a. School pan na kawng chhiah in harsatna tamtak naupangte leh thawktuten an tawh thin avangin hma lak sak thuai turin khawtlang hruaitute pawn MLA hi an lo ngen a. Motor kawngpui atanga Secondary School inkar hi 175 mt a thui a ni a, tunah zirtirtu he School ah hian mi 6 leh naupang 38 an awm mek a ni.

Bialtu MLA hian Zanlawn Govt. Primary School tlawh nghal in, School naupang an thathnem tawh avangin Class-room zauh dan tur a enfiah a. Tunah hian zirtirtu mi 3 leh school naupang mi 152 an awm mek a. Zirtirtu an indaih loh dan pawh MLA hi khawtlang hruaituten an lo hriattir bawk a ni.

MLA hian Lungdai a Tlanmual leh Play-ground panna kawngpui 400 mt vel a thui MLA fund atanga Cement Concrete-a siam chu a en nghal a, hna thataka an thawk avangin khawtlang hruaitute lawmthu a hrilh a ni. Lungdai-ah hian MLA Fund atang vekin 600 mt vel a thui kawngpui Cement concrete-in siam tawh a ni.

Pu Lalhmingliana SDO (Civil) Kawnpui, Khawtlang hruaitute leh mipawimawh dang ten MLA hi an tawiawm a ni.