H&TE changtu Parliamentary Secretary Pu H.Zothangliana chuan 24.6.2016 (Inrinni) khan Lawngtlai khawpui chhunga fur ruah sur vanga chhiatna thlenna hmunte a tlawh kual. 

Pu H.Zothangliana hi LADC CEM Pu T.Zakunga, EM Pu Laltlawmlova Chinzah, EM Pu C.Lallungmuana leh MDC Pu LR Dingliana Chinzah te'n an tawiawm a. Lawngtlai Electric Venga thlanmual min leh lei chein a nghawng chenna in chhiate an en a. He lei che hian chenna in 13 nghawngin, in khat chu luah zui ngam loh khawpin a chhia a, a neitute pawh an insawn chhuak a ni. 

Pu H. Zothangliana hian Lawngtlai-III lei tla hniamin National Highway-54 a nghawngna lai leh L-III thlanmual min pawh a en bawk a. L-III thlanmual lei min leh che avang hian thlan pakua sawn a ni a. NH-54 tan tlanga lei che hian a vel in eng emaw zat a nghawng bawk a. Chhungkaw 8 chu hmun dangah an riak chhuak mek a ni. 

Lawngtlai AOC venga lei chein a nghawng BCM Kanaan Kohhran biak in chhung khi bakah, Middle School, YLA Hall chhung khi leh khelmual khi pawh Parliamentary Secretary hian a en a. Hei bakah hian hmun danga ruah sur vanga harsatna thleng thenkhatte a en kual bawk. 

Pu H.Zothangliana chuan lei chein a nghawng veng leh chhungkuate chu thlaphang lo tura chahin, chawpchilh taka thil tih theih tam lo mah se, theihtawp chhuaha sawrkarin hma a lak zui zel tur thu a sawi a. Inven nana thil tih theih awm ang ang chu lo ti phawt turin VC leh YLA te chu a chah bawk. Hei bakah hian a kawl sa silpauline tlem azawng chu an mamawh dan azirin veng hruaitute hnenah hian a pe hlawm dawn a ni.

 Parliamentary Secretary hi a tlawh venga VC leh YLA hruaitute’n an lo dawng sawng a. Hmun hrang hrang an tlawh rual hian, LADC hotute chuan khawpui zauh dan tur leh hma lakna tur thenkhatte an en kual pah bawk.