Vawiin Nov 18, 2011 hian 58th Cooperative Week Lawmna Archives Hall, Babutlang-ah Pu JH Rothuama, Minister zahawm takin a hmanpui. He inkhawma thusawiin Pu JH Rothuama chuan, “India Prime Minister hmasa ber Pandit Jawaharlal Nehru khan India ram mipui hmasawnna turin Cooperative Society hi tha ber turin a ngai a. India ram State tam takin an hlawhtlinpui tawh hle a ni. India ram thil dehchhuahte khawvel hriata pho langtu zaa 70 lai hi Cooperative Sector kutkawih a ni a. Mizoram-in kan la hlawhtlinpui tawk lo hi Department-a thawkte leh Cooperative Society hrang hrangte kan inbihchian a tul hle a ni. Mizorama Cooperative Development Council dinna turin sorkar-in tan a la mek a, thui tak a kalpui tawh a ni,” a ti.

Pu K Riachho IAS, Secretary, Cooperative Department pawhin thu sawiin, Cooperative hlawhtlinna turin sorkar atanga sum hmuh tum ngawt a tawk lova; a hmuna luhchilhin, theih tawp chhuaha hlawhtlin tuma thawhrim a ngai a ni. Mizote hi Cooperative Society tui chilha, Mizoram Department zawng zawng khaikhawm theitu Cooperative-ah hian nasa lehzuala tanlak a ngai a ni,” a ti. India ram State dang : Karnataka, Gujarat leh West Bengal States-ah te Cooperative hlawhtlinzia uar taka sawiin, member-ten tanlak tul a tihzia a sawi.

Pu Lalpekliana, Registrar, Cooperative Department chuan kumina he Theme thupui ‘Inclusive Development through Cooperative’ chu sawiin, mihring hmasawnna tur kawng engkim hi Cooperative Society atanga tihhlawhtlin theih a ni a; Mizoten hei hi kan la hrethiam tawk lo. Society te pawhin thawhchhuah tam aiin Sorkar sum hmuh tam ringawt hi kan tum emaw tih tur a ni a; Society lian te pawh hian kan Society-a thawktute hlawh intodelh bakah, ram tana hlep tam tura nasa zawka tan lak a ngai a ni,” a ti.

He Cooperative Week Lawmna hunah hian thuchah pawimawh tak tak : President of India, President, National Cooperative Union (NCUI), Mizoram Governor leh Mizoram Chief Minister dawn a ni a, chhiar chhuah a ni. He Lawmna inkhawm hi Pu Lalnunsanga, President, Mizoram State Cooperative Union-in a kaihruai a; Rev R.Vanlalnghakan hunserh hmangin, Pu Vanlalsawma, MSCS, Joint Registrar-in lawmthu sawiin hun tihtawp a ni.