Pu J.H.Rothuama, Minister, Co-operation chuan vawiin khan Mizoram State Agriculture, Horticulture, Forestry and Marketting Cooperative Federation (MAHFED) khawmpui vawi 17-na Engineering Officers Club, Babutlang-a neih chu a hmanpui. He hun hi Pu Lalpekliana, Registrar, Cooperative Societies leh Pu R.H.Hminglien Hmar, Under Secretary, Ministry of Tribal Affairs, Government of India ten an hmanpui.

Pu J.H.Rothuama chuan Cooperation hi kan ramah hun reitak atangin a awm tawh a, mahse duh angin hma a la sawn lo ani a ti. MAHFED Member-te chuan rinawmna, taimakna nen mipuite engtinnge kan tanpui theih ang tih rilru pu turin a chah a, chawmhlawm ringawt ni lova state danga thawnchhuah tur thlai, etc. nei thei tura thahnemngai taka tan la turin a chah bawk. Mizoramah rethei bik awm loh nan sorkarin NLUP Scheme-te a kalpui mek a, hei hi a dawngtuten hmang tangkaia taima taka hlawhtlinpui ngei turin Minister chuan MAHFED Member-te chu a chah a ni.

MAHFED Assembly-ah hian Annual Audited Report 2011-2012, Annual Report 2012-2013, Annual Budget 2013-2014 ngaihthlak leh pawm a ni a, hei bakah hian Bye-Law Amendment siam a ni bawk. Report atanga a landanin MAHFED hian kum 2012-2013 chhunga an sumdawnna-ah DAP, UREA, MOP, SSP leh Chinai thi te Fertilizer Company atanga lakluh leh loneitute hnena Sorkar rate siam anga hralh chhuah leh te, Sales emporium atangin lo neihna hmanraw chi hrang hrang Power Tiller, Mini Power tiller, Water Pumpset, Grass Cutter, Oil Palm Harvester hralhchhuah te a ni a. Tender-te chhang ve-in Supply Order te pawh hmuin tamtak chu Supply ve tawh a ni bawk.

MAHFED hian Fertilizer-a sumdawnna bakah hian Project kalpui mek engemaw zat an nei a, chung zingah chuan NCDC atangin Margin Money Assistant cheng nuai 40 hmuh a niin, Ministry of Tribal Affairs, Government of India atangin Grant-in-Aid nuai 24 an dawng bawk a. Project kalpui mek Post Harvest Technology and Management nuai 82 bawhzui mek a ni a. Hmunphiah Marketing, thei leh thlai leh Forestry kaihhnawih Minor Forest produces te a tul anga lei leh hralh ti tura hma lak mek a ni.