Nimin (14.4.2011) khan Pu John Rotluangliana Deputy Speaker, Mamit Bialtu chuan Boishu Festival cum Bru Cultural Meet vawikhatna Bawngva a neih chu a hawng.
He Boishu Festival hawnna inkhawm Pu Biaklawma Moishoy, Bru Cultural Organisation President, Gen. Hqrs. kaihhruaiah thusawiin Pu John Rotluangliana, Deputy Speaker chuan Mamit hi Bial dang kan ang ve lova, Hnam hrang hrang leh chi hrang hrang awmna hmun a nih a vangin inpumkhatna kan mamawh a ni a ti a. Sorkar hian Hnam inpumkhatna Programme hi min buatsaih sak thei se ka duh hle a ni a ti. Pu John-a chuan, Mizo hovin thil tih sual kan nei a, chu chu kan nu leh pa India mite kan do kha a ni a, chutiang bawkin Bru te hian thil tih sual in nei a, ti sual leh tawh lo turin ka chah duh che u a,  Sorkar  hian Bru te leh hnam hnuaihnung zawk te hi a ngaihtuah a vangin tunah pawh Tripura atangin kan la let leh mek che u a, thuawih taka Bru ni reng chunga thlamuang taka Mizoram ah hian awm turin ka chah che u a, Mizo in ni ngai dawn lova Bru ni chunga he District, he Mizoram tana theih tawpa hnathawk turin ka chah duh che u a ni a ti. Tun hnaia kang tuarte Mizoram Sorkarin a tuarpui tak zet a, tuna Bru lakkir lehna kal mekah tumahin harsatna siam lo turin ka ngen che u a ni a ti a. He Boishu Festival hian engemaw tala hmasawnna a thlen ka duh a, chutiang tur chuan Bru unaute ka chah duh che u a ni.

He Festival ah hian Pu Ngurbiaka, Joint Director, Art & Culture Department; Pu Zatluanga Sailo, President, YMA Sub-Hqrs Mamit leh Pu Lalmuanzova Pachuau President, MCO, Sub Hqrs Mamit District ten thusawiina an nei bawk.

He Boishu Festival ah hian Bru khaw hrang hrang 17 tangin Palai mi 200 chuang an tel a. Bru hnam lam chi hrang hrang ah intihsiakna an nei bawk a ni. He Festival hi Zanin hian a tiak dawn a ni

Pu John Rotluangliana Deputy Speaker hian nimin khan Mamit-a DFO Office sak mek chu a hmunah a tlawh bawk a ni.