Chrismas leh Kumthar lo thleng mai tur tinzawn leh mipuite himna thlira mumal zawka lirthei tlan dan tur leh tawhsual thleng thei laka inven dan ngaihtuah in Joint meeting on Road Safety week Pu John Rotluangliana,Transport Minister hovin vawiin khan a office ah neih a ni a. Pu Hrangtawna IRTS, Secretary, Transport Department leh Pu L Biakthanga, Director, Transport Department, Pu C. Lalthanmawia, Superintendent of Traffic te bakah Road Safety atana kaihhnawih deparment hrang hrang aiawh te an tel kim hle.
Road Safety chungchang ngaihtuaha kalkhawm te chu in kaikual vek an nih avanga thukhawm an nih thu leh Christmas leh Kumthar te a lo hnai a, fimkhur lehzual hun a nih avangin mipuite himna leh motor tlan dan felfai zawk te ngaihtuah ho a tul thu sawiin Pu John Rotluangliana chuan lirthei khalhtu te chu Road Safety chungchanga hnarkaitu leh mawhphurhna sang tak nei an niin an fimkhur a tul em em a ni, a ti a. Passenger phur chi te phei chu mi tam tak nunna kawltu an nih avangin ruihtheih thil hrang hrangah an fihlim ngei ngei tur a niin rui chunga lirthei khalh te chu an chungah dan lek kawh in dimna awm hauh lovin kalpui tur a ni, a ti a.
Pu Hrangtawna, Transport Secretary chuan Traffic Rules chungchanga Supreme Court hrang hrangte sawiin Mizoramah pawh hei hi an zawm nghal dawn a ni tiin a bik takin heng inlehpelh (over-taking) te, phurh zawh tawk aia tam phurh (over-loading) te, rui chunga lirthei khalh leh lirthei khalh chunga mobile phone hman leh zial zukte chu phalloh a niin hetiang ang ti an awm chuan khauh taka bawhzui tur anih thu a sawi a. Statistics a a lan danin tunhnaia motor accident 39 a 37 chu driver tih sual a ni a, chuvangin Driver te hi khauh zawka check thin tur an nih thu leh two wheeler khalhtu ten traffic police signal an ngaipawimawh lo thin te, hmeichhe scooty khalh thiam lo khalh chhuak ve thinte hian traffic an ti jam nasat zia chungchangte sawi hovin hemi kawngah pawh hian hmalak dan tur rem an ruat nghal bawk a ni.
Pu C. Lalthanmawia, SP Traffic pawhin motor kaldan tur chungchangah remruatna hrang hrang an neihte sawiin Road Safety chungchang hi member ten uluk takin a sawiho nghal a ni.
