Pu John Rotluangliana, Tourism Minister chuan vawiin khan Tourism Directorate Building thar, New Secretariat Complex-a mi chu a hawng a. Hawnna inkhawm hi Pu TT. Zothansanga, Parliamentary Secretary, Tourism Department in a tel pui a, inkhawm hi Pu V. Lalremthanga IAS, Secretary, Tourism Department in a kaihruai a ni.

Pu John Rotluangliana chuan vawiin hi Tourism department tan chuan ni lawmawm tak a nih thu sawiin he department hi department dang zawng zawng entawntlaka leh midangte tan biak nuam department kan ni tur a ni a ti. Kan ‘In’ hi hnam zawng zawng lenna tur a ni tiin, kan thupui chu Hawihhawmna a ni tur a ni a ti. Mizoram darthlalang kan ni tih hre thar turin leh khualzin tun aia kan hip theih dan tur atan ngaihtuahna hmang thar leh theuh turin Minister chuan a chah bawk.

Pu TT Zothansanga chuan keimahni building kan nei hi lawmawm a tih thu sawiin a sa tute an fakawm a ni, a ti a. He department hi hnam dangte laka kan ram hmel lanna a ni tih hre renga hnathawk turin thawktute a chah a ni. Tourism Department hi February, 1987 khan Information & Public Relations Department atangin a indang a, tunah hian Tourist Lodge 46 an nei a, Tourist Lodge 5 - Khanpui, Sakawrdai, Paithar, Sairang leh Buhchang te chu mimal kutah hlan a ni tawh.

Tourism Department chhinchhiah dan chuan 2014 - 2015 chhung khan khualzin mi 68416 ten Mizoram an rawn tlawh a ni. Directorate Building hi Rs. 217.32 lakh senga sak a niin 11th May, 2011 khan sak tan a ni.