Pu Joseph Lalhimpuia Parliamentary Secretary chuan India ram sum leh pai harsatna karah Mizoram sorkar-in zirna siamthat kawngah theihtawpin hma a la mek. He thu hi vawiin chawhnua Mizo Students Union din cham Rising Day I&PR Auditorium-a neih a hmanpuinaa a sawi ni.

Pu Joseph Lalhimpuia chuan MSU Rising Day a hmanpuinaah India ram sum leh pai harsatna kara zirna siamthatna kawngah sorkar-in theihtawpa hma a lak mek thu a sawi a. Tun hnaiah MPSC zirtirtu lakna tur result a tihchhuahah Primary school zirtirtu atan 109, Middle school zirtirtu atan 34, an vain mi 143 an tling thar a, heng mite hi appointment order pek mai tur an ni tawh a ti a. An ni bakah hian zirtirtu dang Primary School zirtirtu atan 60 leh Middle School zirtirtu atan 55, an vaiin 115 lak lehna turin MPSC ah thlen a nih tawh thu a sawi bawk. Zirna siamthatna kawngah sorkar a tlanchhe lova, sum leh pai harsatna karah pawh zirna siamthat nan sorkar-in zirtirtu a la zel a ni a ti. School Education Department hmalakna chi hrang hrang a sawiah Pu Joseph Lalhimpuia chuan Additional Central Assistance hnuaiah tun hnaiah Vaibelchhe 10 min pe a, Special Plan Assistance hnuaiah Aizawl DC Office bula DEO/SDEO building sak that nan vaibelchhe 8 min pe dawn a, Govt. of India in hei hi a release tawh a ti a. NLCPR ah Education Reform Commission rawtna tihhlawhtlin nan NEC in Vaibelchhe 15 min pawmsak a, DPR buatsaih mek a ni a, Doner-in Vaibelchhe 10.4 min pe dawn a, hemi hmang hian Lungleiah Education complex sak a ni dawn tih a sawi bawk. Kumin atang hian School Education Department chuan zirlai titha te HSLC leh HSSLC zirlai Board Exam-a pakhatna te hnenah lawmman atan cheng singnga theuh a pe dawn tih a sawi a. HSSLC zirlaite chu stream hrang hranga tithate hnenah he lawmman hi pek an ni dawn a ni a ti.

Parliamentary Secretary chuan Clean Mizoram Movement hmalaknaa thla hlui January 30 a faina beihpui hnatlangah Mizoram puma YMA branch leh School te an hnatlang tha hle a, hnatlang lo hriat tur an awm lo tih sawiin hemi ni a hnatlang zawng zawng hi mi 3,34,490 an tlin thu a sawi bawk.

MSU Rising Day-ah College hrang hrang leh University ten faina hnatlang an nei thei chu lawmawm a tih thu a sawi bawk. Zirlai kalkhawmte chu khawtlang, kohhran leh ram hruaitu an ni thei tih sawiin zirlai insumthei, zirlai tumruh, zirlai taima ni turin a chah a. Mizoram hun lo awm tur chu zirlaiteah a innghat tih a sawi bawk. MSU hi Ni 11.2.1986 khan Pu R.Vanlawma hovin Aijal club ah din a ni a, Mizoten remna leh muanna kan neih theih nan te, zirlai hmasawn nan te hna a thawk a, kum 2013 ah Rising Day hi February ni 12 a lawm turin rel a ni ta a ni. MSU Rising Day pual hian nimin khan Aizawl khawpui chhunga Collge hrang hrangten faina hnatlang an nei a, kawtthler lun lai leh mipui vantlang hmun thenkhatte an tifai a. District thenkhat Kolasib leh Lunglei-ah te pawh faina hnatlang hi neih a ni a. N.Delhi-ah MZU a Economics Department zirlaiten Delhi Mizoram House Vasant Vihar a mi chu tifaiin an hnatlang bawk. Rising Day pual hian MSU hian School leh College zirlaite pualin essay competition buatsaih a ni a, essay inziahsiak lawmman te hi Pu Joseph Lalhimpuia’n a sem nghal a ni.