New Delhi-a cham mek School Education Parliamentary Secretary Pu Joseph Lalhimpuia chuan Thawhtan (28.11.2016) khan DONER Secretary Pu Naveen Verma, IAS chu hmuin Education Complex, Lunglei a din chungchang a sawi pui.

Mizoram Education Reforms Commission recommendation angin Education Complex hi Mizoram sawrkar chuan a ngai pawimawh in State Project Priority-ah a dah a. Hemi hnu hian Doner Ministry pawhin hmalak tur (retained project) zingah a lo thlang a, mahse DONER-in guidelines thar an hman leh avangin DONER Ministry project DPR–te endiktu, Wapcos pawmpuina nghah mek a ni. Wapcos-in a pawmpui hnuah state sorkar phalna lak leh tur a ni ang.

Hei bakah hian Parliamentary Secretary chuan Chanmari Hall ( Indoor stadium) sak mek chungchang sawi puiin, 3rd installment pek an nih chuan sak zawh mai theih a nih thu a sawi a, pawisa bang chu pe chhuak thuai turin a ngen a ni. Pu Naveen Verma pawhin Chanmari-a Lunglei Hall sak mek chu amah ngeiin a hmunah a hmuh thu sawiin, sak hna pawh tha tawk a tih thu a sawi a. June 2016 report anga pawisa pek tur an pek tlak tawh thu leh an hnathawh zawh chin report a nih veleh pawisa la bang pawh release nghal an tum thu a lo hrilh a ni.

Pu Joseph Lalhimpuia chuan Ministry of Micro , Small & Medium Enterprises (MSME) pawh dawrin Zoram skill workers leh Industry din turte tan hmasawnna tamzawk awm thei te a sawipui a. Tunah hian MSME guidelines thar siam mek ah hian hmarchhak ram te tan pawh thu lawmawm a awm a beisei thu a thlen a ni. Guidelines thar duang tur hian sawrkar laipui chuan One-Man Committee on MSME Policy dinin, Dr. Prabhat Kumar, Former Cabinet Secretary chu Chairman atan a ruat a, kumthar ah Policy thar hi peih hman tum a ni.

DONER Secretary hi Pu Rajendra Chaudhury, Director i/c North-East changtu in a tawiawm a ni.