Vawiin chawhma dar 10:00 khan Pu Joseph Lalhimpuia, Parliamentary Secretary, School Education Department chuan Mizoram School Hockey Team, U - 17 (Girls) Champion te chu Mizoram House, Guwahati ah thingpui in puina a nei a. He hunah hian Pu Joseph Lalhimpuia chuan All India Level Sports inelnaa Mizoram School Hockey Team an Champion thei chu lawmawm a tih thu leh Mizo hnam an chawimawi thu a sawi a, Coach leh Players te an thawhhona a that zia langchiangin fakawm a tih thu a sawi bawk. Zirna mai bakah thianghlimna, hriselna leh taimak kawngah te, dikna leh rinawmna vawn nun kawngah te pawh tanlak a pawimawh thute sawiin an kal zelna turah duhsakna a hlan bawk a ni. Pu Joseph Lalhimpuia hi Pu V. Laltlanliana, Asst. Resident Commissioner, Guwahati, Mizoram House chuan a tawiawm a ni.

60th National School Games ni 3 - 7, January, 2015 chhunga Ranchi a neihah Mizoram School Hockey Team, U - 17 (Girls) te hian Final-ah Jharkhand chu 3 - 2 a hnehin an champion a, Mizoram School Hockey Team te hi Coach Lalrothuami’n a hruai a, an senso zawng zawng hi Sports Department ten an tum sak vek a ni.

School Education Department chuan School Hockey Team te hi Incentive Cash Award Rs. 5.000/- theuh an hlan dawn a ni.