Vawiin chawhnu khan Pu Joseph Lalhimpuia MLA,MYC Chairman chuan School Education Department hnuaia Project lian ber cheng nuai 1040 senna tur Teachers Training Complex sakna tur,DEO Complex,Electric veng Lungleiah a phum. 

Lungphum phum zawha inkhawm,Convention Centre-a buatsaih,Pu Lalhuliana Joint Secretary, School Education department kaihhruaiah Pu Joseph Lalhimpuia chuan Lungleia  Education complex din anih theih nan kum 2006 chhova SSA hnuaia a thawh lai atanga an buaipui tawh tih sawiin project an siam te Joint Director paltlang zolo thin mahse,MLA anih hnuah theih tawp chhuaha an bawh zui thin thu sawiin tuna bultan thei tura engkim peih fel ani ta chu lawmawm a tih thu a sawi a. Hun reilote chhungin chhim lamin zirna piah lamah kawngtin rengin malsawmna dawngin hma a sawn chak hle a. Tunah chuan Technical lama kal tumte tan leh IAS nih tumte tan Coaching Centre tha tak kan nei ta a. Heng hi kan zirlaite hian hmang tangkai thiam sela,Lungleiah Mizoram Oxford din thar leh se ka duh a ni,a ti. 

Pu Lalchungnunga, Deputy Director, School Education in report-a a tarlan danin building sak tur hi Block pahnih,Teachers Training Complex leh Teachers'Accomodation tura sak ani dawn a.Teachers Training Complex hi chhawng sarih leh Teacher's Accomodation hi chhawng li a sak tura ruahman ani a.Kum hnih chhunga sak zawh hman tura tih niin LB Associates,Bawngkawng-in a sa dawn a ni.

Attachment

  • Loading attachment...