No.1292/2021-2022

Mamit 8th July, 2021 : Pu K. Lalrinliana, Hon'ble Minister, Food, Civil Supplies & Consumer Affairs, Local Administration Department, Fisheries Department chuan vawiin khan Chuhvel, Rengdil, Kawrthah leh Tuidam khua te a tlawh.

May Ni 30,2021-a Pu John Halidaya'n a huan Chuhvel ramchhunga a thlam sak mek, Assam lam mi uniform ha engemawzatin kalchilha sak chhunzawm tawh lo tura an tih thu kalzelah Minister hian Chuhvel khua hi tlawhin Chuhvel mipuite chu a thlamuan a. Kan rama ruihhlo rawn tawlhruk tum ven a, kan ram chhunga hmasawnna hna thawh leh Sipaite duty-na hmun siam chu Sorkarin a ngaihpawimawh ber a nih thu a sawi.

Minister hnenah hian Chuhvel khawtlang mipuite'n an harsatna leh mamawhte lo thlenin Chuhvel khawchhung atanga Hnanglui Zau panna kawng (KM 1.7) siam that an dil chu Minister hian a theih ang anga hmalakpui a tum thu a sawi a. Chuhvel Jt. NGO thurel angin Chuhvel khua-a Police Outpost dah turin Minister hnenah hian an lo thlen bawk.

Chuhvel rama buaina awm chungchangah hian Dr. Lalrozama, IAS, Mamit District Bawrhsap chuan boruak muanawm a awm theih nan theihtawpa hmalak mek zel a nih thu a sawi a. Helai huan ram Pass hi Pu John-a hian Periodic Patta No. 122 of 1985, Asst. Settlement Officer, Mamit District a nei a. Pu Johna'n a lei hma pawhin a neitu hi Mizo vek an nih thu a sawi. He ram chungchanga an hmalak dan tarlangin June Ni 2 khan Mizoram chhunga Assam Police leh mipuite rawn kal a, loneitute an rawn vau thin chu thil duhawm lo tak anih thu leh tunhnuah harsatna rawn siam tawh lo turin Hailakandi DC hnenah lehkha a thawn thu a sawi a. June Ni 11-ah Hailakandi DC hnenah bawk Mizoram chhung Pu Johna huan rama lut tawh lo tura hriattirna lehkha a thawn leh thu leh report kimchang Home Department-ah a thlen thin thu a sawi a. SDO(C) Kawrthah leh SDPO te'n an hmunah hian an vil reng thu leh Assam sipai an rawn chetchhuah apiangin an rawn kal ni la lain a hmun an pan chilh nghal zel thu a sawi a. A hmunah hian boruak thalo thleng palh thei veng turin 3rd Battalion MAP, 4th IR bakah CRPF Platoon 1 an awm mek thu sawiin CRPF te hian Pu Johna huanah hian nitin darkar 24 patrolling an neih thin thu a sawi a. July Ni 1 khan Home Department-ah Security Force Duty dah belh tura ngenna a thlen thu a sawi bawk.

Minister hian vawiin vek khan Rengdil leh Tuidam Supply Godown leh Staff Quarter sak mekte a tlawh a. Godown sak mekte hi 2500 qt. buhfai chhekkhawl theihna tur a ni. Tunah hian Rengdil Godown-ah hian buhfai stock 1876.59 qt. awm mekin kumin September thla thleng daih tur a ni.

Minister ho hian Kawrthah Div. PWD IB-ah Secretary leh Director FCS&CA, EE PWD Kawrthah te nen nitina Mizoram mamawh hrang hrang eirawngbawlna Gas, Petrol leh Diesel lakluh chungchangah inkawmhona neih a ni a. Heng mamawh hrang hrangte hi Assam atang chauh ni lo, Tripura atanga chawkluh theih dan tur rel ho nghal a ni a. Mamit DC chu North Tripura DC nen inlaichinna tha Diplomatic Relations lo vawng tha zel tura chahin hei bakah hian Mamit District chhunga Bailey Bridge leh kawngpuite chu a lo tlo zawk nan load limit leh Bridge bulah Speed Breaker siama hmala turin an ti a ni. Minister hian Teirei Bailey Bridge a tlawh nghal bawk.

Minister hi Mamit atangin Dr. Lalrozama, IAS, DC, Addl. SP, DCSO bakah SDO (C) Kawrthah, Dy.director Supply, SDPO Kawrthah DIPRO te'n an tawiawm a ni.