868/2025-2026

Dated Aizawl, the 20th June 2025: Vawiin khan Pu K. Sapdanga, Hon'ble Minister, Home Department chuan Prison Department Jail Warders, Batch 14 na, Central Training Institute, Sesawng-a Basic Training course kal zote puala hun buatsaih, Passing Out Parade-ah khuallian niin hun a hmanpui a. Pu Vanlalmawia, Home Secretary chuan khual zahawm niin a hmanpui bawk.

Thu sawiin Khuallian chuan Training pawimawhzia a sawi a, service atan chauh ni loin ni tin mi dangte nena khawsak hona thlenga a pawimawh thu a sawi.

Uniform ha thinte zahawmna sawiin Uniform hak hian dan leh thupek zawm tu an nih tih a lantir a, chuvangin zaha, ngaina tur leh uluk taka vawng fai thin turin a fuih bawk. Hei bakah hian Home Department chhunga uniform cadre hrang hrangte dinhmun chawi sana, tih zahawmna tur thil tam tak duan mek a nih thu sawiin ram ven hna thawktute tan thahnem ngai takin Sawrkar pawh a inbuatsaih thu a sawi a. Warder-te chu ram leh hnam tana thawk an ni tih hre reng a, rinawmna leh dikna nena hna thawk thin turin a chah bawk.

Basic Training hi April ni 26, 2025 atanga neih tan niin thla hnih chhung neih a ni. Warders training chhuakte hi an vaiin mi 29 niin Mipa 18 leh hmeichhia 11 an ni a; vawiinah vek khan Pu Lalrengpuia, Commandent, CTI chuan rinawm tura intiamna (oath taking) a neihpui nghal a ni.

Vawiin hun hmannaah hian training neih chhunga ti tha bik mi panga thlanchhuahte hnenah Khuallian chuan lawmman a hlan bawk a ni. Lawmman dawngtute chu: -

1. Home Minister Award for Best All rounder - Female Warder Lalrinawmi

2. Home Secretary Award for Best Drill - Warder Lalrinliana

3. IG Prison Award for Best Firer - Warder Lalnunkima

4. Commandant General Award for Best Discipline - Warder F Lalrinmawia

5. Commandant CTI Award for Best Turn Out - Warder RC Lalzarmawia te an ni a; Trophy, Citation leh Medal bakah tangkafai hlan an ni.

Passing Out Parade hun hmannaah hian Pu R Vanlalsawta, IG Prisons; Pu P.C. Lalduhthlanga Joint Secretary, Home Department; Pu Lalremkima Superintendent, Home Department leh sawrkar mi pawimawh dangten khuallian hi an tawiawm a, Pu R. Vanlalsawta, IG (Prison) chuan lawmthu sawiin hun hi a khar a ni.

Passing Out Parade programme hman zawh a nih hnu hian Home Minister chuan CTI hmunhmate tlawhin a fang kual nghal bawk a ni.