3133/2024-2025

Champhai, 21st November 2024: Vawiin chawhnu khan Home Minister Pu K. Sapdanga chuan Sub Headquarters YMA in Champhai Zion Venga raltlante awmna tura ruahman a tlawh a, Champhai Zote a Refugee Camp a tlawh bawk. 

Refugee Camp a tlawh zawh hian UD&PA Minister ni bawk Pu K. Sapdanga hian a Department hnuaia hmalakna pahnih - Truck Terminal, Champhai Zotlang a mi leh Solid Waste Management Center, Champhai Mualkawi a mi chu a tlawh a. Sawrkar department hotute leh khawtlang hruaitute nen an inkawmin, heng hmun tihchangtlunna kawnga harsatna la awm te an sawiho a ni.

Solid Waste Management Center Champhai-ah hian Bawlhhlawh sawngbawlna tur in pahnih ṭawih thei lo sawngbawlna (Dry Waste Processing Shed) leh ṭawih thei sawngbawlna  (Wet Waste Processing Shed) te sak tawh a ni a. Ṭawih thei sawngbawlna sak nan hian  cheng nuai 58.48 (₹ 58,48,667) sen niin; ṭawih thei lo sawngbawlna sak nan hian cheng nuai 72.32 (₹ 72,31,431) sen a ni a, cheng nuai 52.92 senga thawmṭhat tum mek a ni bawk. Bawlhhlawh sawngbawlna tur khawl hi bun tuma hmalak mek a ni a, kumthar lamah chuan a nihna tur anga kalpui theih tawh tura beisei a ni.

Champhai Truck Terminal hi cheng nuai 447.33 (₹ 447,33,689)  senga sak a ni a. CFH Consultancy Services, Republic Veng, Aizawl ten a sak hna an thawk a, April ni 6, 2024 khan Completion Certificate pek chhuah tawh a ni.