Nimin khan Parliamentary Secretary Pu K. Lalrinthanga chuan Bilkhawthlir ah Sub Divisional Agriculture Office (SDAO) building leh SDAO Quarter sak thar te a hawng.

Hemi puala hun inkhawm tawi buatsaih, Pu R. Lalnunzira, District Agricultural Officer (DAO) kaihhruai ah hian Parliamentary Secretary Pu K.Lalrinthanga chuan heng building thar pahnih te hi NLUP avanga sak theih anih thusawiin, Sawrkarin Agriculture leh Allied Sector-te tan NLUP kaltlang a Budget ah sum a dah tam avangin Sawrkar Laipui chuan Rashtriya Krishi Vikas Yojana sum chu 2011-2012 atangin Mizoram a rawn pe ve tan a, RKVY sum kan dawn hi NLUP rah liau liau a ni, a ti.

Pu K.Lalrinthanga chuan NLUP hmasa zawk ah khan Rs. 30,000/- a bultanin Bilkhawthlir a kuhva chingtuten hma an la a, vawiin ah chuan an thawhrimna leh an taimakna zarah kumtin nuai tam tak an la lut tawh a, chuvangin tunah NLUP kaltlanga nuai 1 dawng te pawh hian hun kalta a mi hlawhltling te entawn a, rilru an nei a, theihtawp an chhuah chuan hlawhtlinna an hmuh ve ngei a rin thu a sawi.

SDAO Office building hi a zau zawng Plinth Area chu square feet 865 niin cheng nuai 10 senga sak a ni a, SDAO Quarter hi a zau zawng Plinth Area chu square feet 976 niin cheng nuai 15 senga sak a ni. He building pahnih te hi RKVY sum hmanga sak a ni.