Pu K.Lianzuala, MLA, Chairman Mizoram KVI Board chuan India Independence Day vawi 66-na Hnahthial-ah hmanpuiin Hnam Puanzar a pawt pharh a, Parade Contingent 12 te chibai a chhang let.

Independence Day lawmna Hnahthial HBSC Playground No.1-a neihah hian Khuallian Pu K.Lianzuala, MLA chuan mipui pungkhawmte Independence Day chibai buka thu sawiin, “Kumpinu awpna lak atanga India ramin Zalenna a hmuh champhaah hian, ram leh hnam tana huaisen taka beitu Hnam Pa Mahatma Gandhi leh a thuihhruaite kan hrerengin zahna chibai kan buk a, chi hrang, hnam hrang leh sakhaw hrang hrangte zalen taka kan len theihna India ram ropui zia leh zalenna hlut zia hriain mipuiten Zalenna Champha hi hlut thiam ila, remna leh muanna tichhe thei thil reng reng malmakin remna leh muanna kan neih chhoh zel theih nan tan i la tlang zel ang u” a ti.

“Zalenna hnuaiah Pu Lal Thanhawla kaihhruai sorkar pawhin hmasawnna kan neih theih nan kal a siam mup mup a, mi harsa leh rethei zawk ten lei rem an raha eizawnna ngelnghet an neih theih nan NLUP hmangin kum 2011-2012 chhung kham chhungkaw 90139 hnenah cheng vaibelchhe 234 zet sem a ni a. Kum 2012-2013 chhung atan Planning Commission-in cheng vaibelchhe 370 zet min rawn pawmpui lehin chhungkaw 1,20,000 vel zet chhawmdawl tum leh mek a ni” a ti.

Hmasawnna kawng hrang hrang, inkalpawhna lamah te, tui thianghlim in tur hnianghnar pek lamah te, kawlphetha siamchhuah lamah te leh thalaite nun kaihruai turin sports mai bakah zirna lamah te pawh Pu Lal Thanhawla kaihhruai sorkar chak takin hma a lak chhoh mek thu sawiin, heng hmasawnna hrang hrang zarzotu tur hi mipuite kan nih avangin khawlhkham siamtu ni lova, sorkar tanpuitu ni turin mipuite a sawm bawk.

Khuallian Pu K.Lianzuala, MLA hian Independence Day puala inelna hrang hranga tithate leh March Pass-a tithate lawmman a sem nghal a. Chhun dar 12:00-ah PWD Bungalow-ah At Home neih zui a ni a, Sub-District Hospital-a damlote tlawhin Independence Day thilpek hlan nghal an ni. Tlai dar 1:30 ah Independence Day Football Final hmuhnawm tak khelh a ni bawk.

Pu K.Lianzuala, MLA hi a nupui Pi Zothankimi te bakah Mizoram KVI Board Official ten an tawiawm a ni.