Vawiin khan Parliamentary Secretary Pu K.S. Thanga’n Agriculture Conference Hall-ah Director of Agriculture (R&E), Pu C. Lalniliana lehkhabu ziah ‘Tuantul’ a tlangzarh.

Agriculture leh a kaihhnawih eizawnna chu vawiin ni thlenga Mizo mipui tam zawk te eizawnna a la ni tih sawiin Agriculture changtu Parliamentary Secretary Pu KS Thanga chuan thlawhhma la a lo leh thlai huan neia eizawng te tan chuan he lehkhabu hi rotling, malsawmna a nih ngei a beisei thu a sawi a. Lehkhathiamlo leh zir hniam tak te atanga University zirlai te thlengin chhawr nahawm tak a nih a beisei tih sawiin Pu KS Thanga chuan Mizo tawng ngei a chhiar theih tur Agriculture mithiam takin heting lam hawia eizawng te tana lehkhabu tangkai tak tur a buatsaih thei chu chhuanawm a tih thu leh lawmawm a tih thu a sawi a ni.

Agriculture Department Crop Husbandary Publication Board tihchhuah he ‘Tuantul’ lehkhabu tlangzarhna inkhawm hi Director of Agriculture (Crop Husbandary) Dr C Lalzarliana’n a kaihruai a, Joint Director (MMA) Pu H Lalthanpuia’n a bu chhung thu bihchianna hun a hmang a ni.