Vawiin khan Lamchhip leh Chawilung khuaa Pradhan Mantri Gram Sadak Yojana (PMGSY) hnuaia inkalpawhna kawng siam hna Bialtu MLA Pu KS Thanga chuan a enfiah a. PWD Hmuifang Division EE Pu R.Zirsangliana leh SDO Pu Lalremruata ten an tawiawm a. Lamchhip leh Chawilung khawtlang hruaitute kawmna a nei nghal a ni.

Bialtu MLA Pu KS Thanga chuan PMGSY hnuaia kawngpui siam hna chu tha taka zawh fel a nih theih nan theihtawp chhuah a nih tur thu a sawi a. Hmuifang atanga Lamchhip leh Chawilung inkalpawhna kawngpui siam hna hi tender chhhuah niin harsatna neuh neuh hnuah kalpui a ni ta a ni, a ti a. Khawtlang mipuite chuan kawng siam chungchangah thahnemngai taka PWD hotute leh hnathawkte bakah contractor thlengin tawiawm a, thawkho turin a fuih a. Central YMA leh PWD pawhin kawng tha zawk kan neih nan thawhhona tur thuthlung an ziak tawh a ni tiin kawng enfiahpuia, thil fel lo a awm a nih chuan siam that chungchangah tha taka thawhho a tul thu a sawi a.  Bialtu MLA chuan khaw pahniha community hall sak mek a tlawh nghal a. YMA, MHIP, MUP leh thalai pawl hruaitute nen inkawmna hun neiin harsatna hrang hrang leh hmalak dan tur te sawiho a ni.

Pradhan Mantri Gram Sadak Yojana (PMGSY) hi sawrkar laipui scheme a ni a, kawng tha zawk neih a nih theih nana hmalakna a ni. Hmuifang atanga Lamchhip leh Chawilung khaw kawng siam hna hi PMGSY Phase IX hnuaiah awmin a sei zawng chu 10.38 kms a ni a. Kawng hi formation width-6m, pavement width-3m tur niin retaining wall, breast wall, side drain etc. siam a ni bawk ang. Mizoram Technocrats Company ten kawng siam hna hi an kalpui a. November Ni 27, 2017 khan tanin Rs.6,03,32,950.42 hmangin kum hnih chhung thawh a ni ang. PMGSY hnuaia kawng siam reng reng hi endiktu chhawng thum an awm a, kawng siam huam chhunga PWD officer ten an endik phawt a, PWD PMGSY Cell in an endik a, chumi hnuah sawrkar laipui atangin an endik leh thin a ni.