Tachhip Branch YMA leh ASEP te bultuma buatsaih Chungleng Savate tuallenna tur Birds Spot chu helai bialtu MLA Pu KS Thanga ,Agriculture Minister chuan vawiin khan Tachhip lal mual hlui ah a hawng a.He ni pual hian thing phun nghal a ni bawk. Pu Lalrinmawia Political Adviser leh ASEP member leh Tachhip YMA hruaitu leh khawtlang hruaitu ten he hun hi an hmanpui a ni.
Mizo History a hming lang hmingthang tak tak Sibuta te, Tualvungi leh Zawlpal te leh mithiam hmasa Kaphleia te hmingputna Tachhip khua ah Chungleng Savate tualchaina Birds Spot hawng theia a awm avanga lawmthu sawiin khuallian Pu KS Thanga chuan amah ngei pawh a seilenna khua anih thu a sawi a.Khawvelah hian hmun ropui leh changkang tak tak a tam tawh a, chung chu khualzin te hiptu ber an ni thin. Keini Zoram ah hi chuan chutiang thil ropui avang chuan an lo kal hrih kher lovang, mahse leilung pianken siamchawp nilo, boruak thianghlim leh nuam te, ramsa leh nungcha tinreng te tuallenna mawi tak te thlir kual theiha awm hi khualzinte hip tu tur an ni a, chuvang chuan silaia nungcha te veh tawh lovin thlalakna nena veha kah tawh zawk tur a ni a, hemi chungchang hi uar leh zuala in zirtir a ngaih thu a sawi.
Pathian hian Mihringte hi nungcha te nena inbe pawp thiam turin a siam a, ramchangkang zawkah te phei chuan mihring tawng leh thusawi hi nungcha ten an hre thiam a, chuvang chuan ei tham loh Sava mawi tak tak te hi humhalh an ngai a ni tiin Minister chuan helama tan la tur hian Humhalhna Dan mai bakah mipuite pawh tanrual a ngai a,Tur hmanga nungchate hrai te hi sim hmak tur a niin a tuartu chu mihring bawk anih theih thin avang in chin tawh loh atana tha a nih thu a sawi ani. Chungleng Savate tuallenna Birds Spot chu khuallian chuan Tachhip Lal Mual hluiah hawngin hriatrengna tur thing a phun nghal a. Tachhip YMA ten a tula hman tangkai turin Rs. 10000/- a pe bawk ani.
Khual zahawm Pu Lalrinmawia, Political Adviser pawhin thu sawiin ram changkang zawk te pawh in an la neih loh Birds Spot kan ram,Tachhip ah ngei siam a lo ni chu lawmawm a tih thu leh Tachhip khua a lawmpui thu a sawi a. Naupang te ah tan lak a ngaiin Nu leh Pa leh enkawltu ten ramsa leh savate humhalh a tul zia an zirtir a ngaih tthu a sawi.
Hawnna inkhawm tawi ASEP President Pu K.Lalmuansanga kaihruai ah hian Pu Lalhmunsiama ASEP hruaitu in sava hram dan a entir a Tachhip Branch YMA President Pu H.Vanlalrawna chuan lawmthu a sawi., hetah hian Tachhip khaw chhunga zirna in zawng zawngte Tachhip khawtlang hruaitu YMA, VC, MHIP leh MUP te an tel a, Aizawl lam atangin Association for Environmental Presentation (ASEP) hruaitute leh member engemaw zat an tel a ni.
.Birds Spot hmun hma puitlin na tur atan hian kum khat vel zet Tachhip Branch YMA leh ASEP General Headquarters, Aizawl ten inbiakna an lo neih tawh hnuah June 21, 2018, Lalmanga Nu lawm rawihni khan inbiakremna (Agreement) ziak felin Tachhip YMA Park chu Birds Spot atana puan an rem ti a. A hming atan ‘Tachhi-Asep Birds Spot’ tih vuah a ni a. Hei hian a hming hmasa YMA Park tih chu luahlan lovin nungcha leh sava humhalhna atan he hming thar hi a put belh ta a ni.
Mizoram hi a pumin Bio diversity hotspot a ni a, Khawvelah hetiang hotspot hi 32 vel a awm. Tin, hei aia chungnung zawka ngaih khawvelah hian Mega Diverse countries 17 a awm a. Chung zingah chuan India ram hi a tel ve phak a. India ram a lan ve theihna hi South India, Himalayan Range leh North East States te vang a ni a, heng zingah hian Mizoram hi a tha berte zing a mi a ni a, chuvang chuan Mizoram hi a pumin Birds hotspot a ni bawk a ni.
Chutih lai chuan Bird Sanctuary emaw, Birds Spot emaw pawh pakhatmah neih a la ni lova, Tachhip YMA ten an ram hlu tak hetiang atana an remti hi Zoram tan thil hlu tak a ni.
