Nimin, February ni 11 tlai khan Mizoram Rajya Sabha MP Pu K.Vanlalvena chuan Union Minister of State for Home Pu G.Kishan Reddy chu a office chamber ah hmuin kumin February ni 9 zana Bairabi Zophai leh Garmurra Assam a thil thleng chungchang leh thil dangte a thlen.

Pu Vena chuan Mizoram chhunga Mizoram sawrkar mi tirhte Assam mi ten kut an lo thlak chungchang leh chumi avanga mihring chenna in hal te, Garmurra mission compound a Mizo Missionary chhungkua te chunga kutthlak a nih thu te Minister hnenah hian a thlen a. Assam chuan thenawm state dangte nen ramri buai an neih vek thu leh hei hi British Administration in ramri diklo a hnutchhiah vang a ni, tiin Assam state a bet lo tur behtir avanga harsatna hi thleng țhin a ni tih Minister hnenah hian a sawi a. Central sawrkarin a rang thei ang bera ramri dik a siam loh chuan hmarchhak state te chu ramri chungchangah ram hrang leh ram hrang ang maia indo thei an nih thu Pu Kishan Reddy hnenah hian a thlen bawk a ni.

Pu Vena chuan kum 2019 a Mizoram All NGO te nen Delhia meeting an neih tumin Union Home Minister Pu Amit Shah-an Mizoram chhung Bangladesh Bordera duty tur Mizo tlangvalte puala BSF Battalion din a lo tiam tawh chu tih hlawhtlin a tul thu pawh Minister hnenah hian a thlen a.Hei hi tih hlawhtlin thuai a nih loh chuan Mizoram mipui ten NDA sawrkar chu rintlak lovah an ngaih phah a hlauh thawn thu Pu Kishan Reddy hnenah hian a sawi a ni.

Union Minister of State for Home a hmuhnaah hian Pu Vena chu a PS Pu Isaac Rodingliana'n a tawiawm a ni.