No.4221/2021-2022

Aizawl the 10th March, 2022:Vawiin chawhma dar 11:00Am khan DRDA District Rural Resource Centre, Siaha-ah Pu Laima Chozah IAS(Rtd), State Election Commissioner chuan kumin MADC hnuaia 12th MDC General Election lo awm tura Siaha district inbuatsaihna te thlirlawka, sawiho pui turin District a MCS leh MPS officer te a meeting pui.

Pu Laima Chozah IAS (Rtd), State Election Commissioner chuan kumin MADC hnuaia MDC inthlanpui kan hmachhawn turah hian Peace,Free and Fair Election a awm ngei theih nana Official te in thawhrimna a fakawm hle a ni; tiin, Final Electoral Roll pawh tun thla ral hma a tlangzarh a ni ang a, chumi hnuah inthlan hi puan nghal a ni dawn a ni, a ti.

Inthlan hun chhung hian Election Model Code of Conduct(MCC) hi khauh taka kenkawh tum tlat tura official te chu fuihin, inthlanna muanawm, thianghlim leh felfai neih ngei tura an inbuatsaihna chu thathlah lova kalpui chhunzawm zel turin vawiin official kalkhawm te chu thu a chah hlawm a ni.

Pu Lalsangliana, District Election Officer leh Siaha District Bawrhsap nibawk pawhin an hmalak tawh chin leh an inbuatsaih dan tlangpui report felfai tak pein, 12th MDC General Election pawh Official te bakah NGO,VC,MJA, Political Party leh Siaha mipui ten an tawiawm thatna zarah tha tak leh felfai taka an tlingtlak ngei a beisei thu a tarlang bawk.

Pu Laima Chozah IAS (Rtd), State Election Commissioner hi Pu VL. Remliana MCS, Secretary, State Election Commission in a rawn tawiawm a ni.