Vawiin chawhma dar 10:30Am khan a ni 2-na atan MSO Gen.Hqrs (Mara Students’ Organization) ten an Golden Jubilee lawmna programme chu Multipurpose Community Hall, Council Vaih-ah an hmang chhunzawm leh a. Vawiin Golden Jubilee Celebration programme-ah hian Pu Lal Thanhawla Chief Minister, Mizoram leh Ex-Minister Pu S. Hiato, MSO President hmasa ber ni bawk ten khuallian leh khualzahawm nihin an hmanpui.

Khuallian Pu Lal Thanhawla chuan thu sawiin Mizoram mihring nuai 10 chuang hret; khawvel sakhaw lian ber ber 3 in min hual vel chung pawha chimrala kan awmlo chhan hi, kan Pathian hian kan chhehvel ringlo mi te hnenah keimahni kal tlanga Isua hmel lantir turin min duh a ni. Mizo te hi Kristian Za-a za kan intih thin a,chutiang a ni chuan Fai leh thianghlim tak,hrisel leh intodelh viau awm tak kan ni mek laiin, khawvela a ber kan nihna te erawh thil chhuanawm lo leh zahthlak thilah vek a ni.kan thalai te hian zuk leh hnuam, ruihthei thil laka fihlim a, lei a kan Pathian kan Nu leh Pa te kan zah a, an thu kan awia, rinawm tak leh taima taka kan thawh chuan, kan Pathian hian Hnam ropui taka min siam dawn a ni, a ti.

Chief Minister chuan sawi zelin, Llook East Policy hnuaia Kolodyne Multi Model Transit Transport Project hian Mizoram chhimlamah hian hmasawnna nasa tak a lo thlen dawn a. Mahse tuna kan thalai ten taimakna, Rinawmna leh Pathian tihna nena rilru lama in lo inpuahchah lawk lo chuan, he hmasawnna leh hausakna lo thleng tur hi thatpui a hnekin kan chhiatpui thei a ni, chuvangin vawiin kan Mara thalaite hian Rinawmna, taimakna leh thianghlimna kawngah te midangte entawn tlaka nung tur che u in, ka chah che u a, duhsakna ka hlan bawk a che u, a ti.

Vawiin Jubilee Lawmna programme-ah hian MSO,Gen.Hqrs-a President leh Gen.Secretary lo nih tawh zawng zawng te hnenah chawimawina thuziak hlan an ni a. Mara rama missionary hmasa ber leh mara rama zirna(education) meichher chhi eng hmasa bertu Rev.Reginald Arthur Lorrain leh Mara literature kungpui Dr.S.Hrachu , Mara Literature-a Doctorate degree hmu hmasa ber leh MSO Theme song phuahtu ni bawk te hnenah Golden Jubilee Special Award ( Posthumously-a) hlan an ni bawk. Golden Jubilee puala Souvenir tlangzarhna hun leh Jubilee puala essay inziahsiak lawmman semna hunte hman a ni bawk.

Vawiin programme hi Pu Hiphei, Speaker Mizoram Legislative Assembly te, Pu RT Zachono CEM, MADC leh a thawhpui te, DC, SP, Head of Office te, Siaha District-a kohhran, khawtlang, tlawmngaih pawl hrang hrang hruaitute leh Chanchinbu mi te bakah; Mizo Zirlai pawl( MZP) Gen. Hqrs aiawh te, Lai Students’ Association( LSA) Gen.Hqrs aiawh te leh Myanmar-a Mara Students’ Association ( MSA) Gen.Hqrs aiawh ten an hmanpui a ni.

Vawiin Programme hi session hnih-a thenin, Session khatna hi Aldrin Laihlei Hlychho, Vice President, MSO Gen.Hqrs in a kaihruaia, Session hnihna hi T.JB Rona, Gen.Secretary, MSO Gen.Hqrs in a kaihhruai ve thung a. Rev.CH.Chhama, Moderator ECM Assembly in Devotion hmangin Rev.Z.Hrohmo, Modertor; CCI(M) Assembly in Benediction in vawiin programme hi a khar a ni.

MSO Programme hman zawhah hian Pu Lal Thanhawla chuan Siaha District Civil Hospital sak lai mek leh MADC, CEM Bungalow sak lai mek te a tlawh nghal a ni.