Tukin khan Pu Lal Thanzara, I&PR Minister hovin Chapchar Kut Run neih a ni a. Sikulpuikawn atanga tlante hi Pu R.K. Thanga, President, MUP in a vailiam a, Chanmari atanga tlante chu Pu Lalrochhuanga, Financial Secretary CYMA in a vailiam.

An thlenkhawmna Aizawl Sipai Lammuala inkhawmna neih hi Pu R.Hmingthanzuala, Director, Art & Culture Department in a kaihruai a. Pu Lalhmachhuana, Organising Secretary, Chapchar Kut Committee 2017 in report tawi pein Chapchar Kut Run neihah hian Aizawl City YMA Branch 70 chuang an tel thu sawiin branch tin atangin member 10 theuh an tel thu a sawi bawk a ni.

Pu Lal Thanzara chuan Mizoten Kut kan neih zinga ropui ber leh huapzo ber, Chapchar Kut 2017 lawm tura Sawrkar leh Central YMA inbuatsaihna hi a ropui a. Mizo mipuite rilrua Chapchar Kut vawn lar leh vawn nun zel hi Sawrkar duh dan pawh a ni. Khawtlang anga inrelbawlnaah te, chhiatni thatni a tlawmngaih chhuah a kan intawiawm thinnate hi a ropui a, hah tak leh rim taka tanpui ngaite tanpuina kawnga kan thawh lai hian hlim tak leh inlungrual taka Kut kan hmang thei tur leh hahchawlhna hun tha kan hmang hi thei tur hi a ropuiin a lawmawm hle a ni, a ti a.

Chapchar Kut lawmna pual a Chapchar Kut Run a vawikhatna atana buatsaih a lo ni ta hi a lawmawm a tih thu sawiin, hei hian thang leh thar lo kal zel turah leh Mizoram pawn thleng pawhin Chapchar Kut ropuina leh Mizo hnam tana a pawimawhna hi a phochhuah ngei a beisei thu a sawi a ni. Mizote Kut pui ber Chapchar Kut hian kan in unauna lo ti pung sela, kan Mizona thinlung lo pianthar tir sela, a bik takin kan pi pute rohlu ‘Aia upa zah’ kawngah kan rilru tih tharin lo awm rawh se, tiin Minister chuan a chah bawk a ni