Parliamentary Secretary Pu Lal Thanzara chuan vawiin khan Kolasib-ah Govt. Diakkawn High School Prize Distribution Day a hmanpui a. State Level-a Volley (Boys) competition neiha champion an nih lawmman leh lawmman chi dang te a hlan a ni.

Thusawiin Pu Lal Thanzara chuan, zirlaite chu tun atanga tum fel tak nei nghal tur leh hmathlir thui tak nei chunga lehkha zir turin a fuih a. Nakina ram hruaitu an la ni thei tih inhre reng turin a chah bawk. Amah ngei pawha zirlaia ram hruaituten an fuihna chu a taka a chan tak avangin zirlaite chungah pawha thleng dik thei a ni, a ti. NLUP chungchang sawiin, sorkar-in a tum ber chu mipui tana eizawnna nghet siam sak a ni a. A sum lokalna chungchangah thenkhatin sawisel mahse sorkar chu a thil tumah a ding nghet tlat a ni, a ti a. India ram hmun dang khawiah mah hetiang policy mipui dinhmun khaichhuahna tur hi a awm ve lo a ni, a ti.

Mizoram hi Pathian in mal a sawm a. ONGC in Meidum a leilung hausakna haichhuak tura leiverh hna an thawh pawh Gas a awm ngei tih an finfiah tawh a ni, a ti. Zirlaite chu sorkar hna ringawt thawk tura in ruahman lova company liana thawh tum turin Pu Lal Thanzara chuan a chah bawk a ni.

Govt. Diakkawn High School Prize Distribution Day hi Pu GS Zaithantluanga, Headmaster in a kaihruai a. Inelna hrang hranga ti thate hnenah khuallian leh amah tawiawmtu a nupui Pi Zotei ten lawmman an hlan a ni. Sikul naupang ten lam, zai leh drama te an entir a ni.