Vawiin Chawhma dar 11 : 00 khan Bualpui “NG” Khelmualah Lawngtlai ‘E’ Constituency M.L.A. Cup vawi-4 na Football Final  khelh a ni.

He Football Tournament Final khelh hma inkhawm tawi  neihah hian Pu Lal Thanzara, Parliamentary Secretary leh President Mizoram Football Association nibawk chu khuallian a ni. Pu Challianzuala Nghaling, President, Eastern Zone Football Association  chuan inlawmna thu a sawi hnuah Khuallian chuan Mizoram Football Association ten hmasawnna nasa tak kan neih thu a sawi a, District tina Football Association te pawh hma an sawn chak hle a ni, ati bawk. Football a hma kan sawn theih nan Mizoram sawrkar chuan chak takin hma ala a, Mizoram Coach te Training pe turin Sapram atangin Coach chah chhuah anih thu a sawi a, hei hian Football-ah hma nasa taka min sawn tir theih a beisei thu a sawi bawk. Mizo te India ram hmun hrang hrang Club tha tak tak-ah an lut chho mek a ni tiin Football khelh hi eizawnna tlak leh tling a ni ati bawk. Heng kan hmasawnna hrang hrang te hi Mizoram sawrkar-in Sports a ngaihthah mai lova Catch Them Young Policy hmanga thalaite Sports hmanga khaichhuah a tum vang a ni a ti a, Football mai nilo Sports Discipline hrang hrangah pawh hma kan sawn nasa em em a ni tiin Mizo thalaite India leh International Level thlenga Sports lama hma kan sawn theih nan sawrkar tha tichak turin mipuite a sawm a ni. Infiammi te chu Taimakna, Chhelna, Huaisenna, Tumruhna leh Tihtaktakna nen a hlawhtlin tum turin a chah a ni. Miretheite khaichhuahna tura sawrkar Flagship Programme NLUP sem hna pawh chak taka kalpui mek anih thu sawiin a hlawhtlinna chu a dawngtute kutah a in nghat a ni a ti bawk.  He Tournament a hman tur hian M.F.A. chuan Football pathum an pe nghal  a ni.

He Tournament ah hian bialtu MLA leh Parliamentary Secretary nibawk Pu H. Zothangliana chuan sawrkar hmalakna vangin Lawngtlai khelmual-ah pawh Phullem phah thuai anih tur thu a sawi a, District chhung hmun kilkhawr ah te pawh Khelmual laihna tur pawisa engemawzat dah anih tawh thu a sawi bawk. Sports lama hmasawn tur chuan khawtlang nu leh pa te pawh kan pawimawh a ni tiin hetiang lama rilru pu turin mipui te chu a chah a ni. Sports lama mi hlawhtling te chu sawrkar hian a ngaihthah mai mai lova an phu tawk leh an phak tawk sawrkar hna pawh pek an nih thin thu a sawi  bawk. Vawiin chawhnu dar 1:00 khan Tournamenmt Final hi Lawngtlai Chandmary leh Lawngtlai Vengpui ten an khel a, lawmman te hi Khuallian leh Pu Zothangliana, Parliamentary Secretary te hian an sem zui nghal a ni. He Tournament a khuallian Pu Lal Thanzara, Paliamentary Secretary hi M.F.A hruaitu thahnem takin an tawiawm a ni.