North Eastern Power Committee a tel tura Shillong a cham mek Pu Lal Thanzara, Parliamentary Secretary to Chief Minister chuan Shillong hmuna Mizoram House sak thar mek chu vawiin khan Liaison Officer, Shillong Mizoram House nen an tlawh.
Mizoram House thar tur hi peih thuai anih theih nan hnathawktute hrilhin a tul anga sorkar atanga hmalak ngai ang te chu lo bawhzui zel anih tur thu a hrilh.

Shillong YMA Group hruaituten Pu Lal Thanzara hi a thlenna Pinewood Hotel-ah an hmu a, Mizoram House sak tharah Shillong Mizo awmten chhiatni thatni ah an awm khawm ve theihna tur ngaihtuah sak ve tura an ngen chu Pu Lal Thanzara chuan sorkarah thlen sak a lo tiam a, NEGRIMS (Hospital) Mizo damlo thahnem takin an pan thin ah pawh, damlote harsatna sutkian nan khualbuk tur a bul hnaiah Mizoram sorkarin lei ve se tih an rawtna pawh lo bawhzui pui a tum thu a hrilh a ni.

Shillong Mizo Students Union (MSU) te pawhin Pu Zara hi an hmu a, Mizoram scholarship Board in scholarship thawn dan thar an duan, anmahni account hawng theuhva chutah chuan thawn nise an tih ah harsatna an tawh thu an hrilh. Mizo Zirlai ten Bank ah Account an hawn dawnin an awmna vengten an hriatpuina lehkha an siam sak duh loh avangin 75 % zirlai ten account an hawng thei lo tih an hrilh.

Scholarship chungchanga harsatna Shillong Zirlaiten an neih dan hi Pu Zara chuan Secretary, H&TE Govt. of Mizoram hnenah Phone in a hrilh nghal a, remchanna dang siam sak turin ngaihtuah nise an ti. MSU Shillong te hian Pu Zara chu ni 6.9.2010 Fresher's Social ah khuallian atan an sawm nghal bawk.

Pu Lal Thanzara hian vawiin lamah Power Department official te meeting neih zawhah  naktuk lamah Minister ho meeting Chief Minister aiawhin a tel ang a, vawiin tlai lamah Meghalaya Power Minister zanriah siam a kilpui dawn a ni.