Champhai Zotlang Branch YMA Golden Jubilee lawmna hmanpuitu Pu Lal Thanzara, Parliamentary Secretary chuan khawtlang nun siamthatu leh Zo hnam vawng himtu YMA kan nei hi a vanneihthlak a, Kristian nun dan tha ngaisangtu anih anga ruihhlo in a bual at mekte thlarau lam chhanchhuahna hna an thawk chu lawmawm a tih thu a sawi.

Mizo Nun ziaa bet tlawmngaihna kan nitin nuna lo dal ta zel chhawm nung tura ngenin, hnam hrisel zawk kan nih theih nan zuk leh hmuam kawngah YMA ten chak takin hma la thei se a duh thu a sawi.

Tunlai kan khawtlang nun ti buai tu, mipat hmeichhiatna hman sual vanga HIV/AIDS kan tawrh mek ti ziaawm turin YMA hian chak zawkin ke  pen thei se a duh thu a sawi a. Kan ram leilung hausakna dap chhuah mekah a leilung fa ten a hlawkna dawng thei tur leh hnam dang ten a hlawkna an tel mai loh nan lo intuai hnum a tul a ni, a ti.

India ram hmun kilkhawrah cheng mai ila, inkalpawhna lamah theih tawp chhuah chhoh a niin hmalak mekna te zawh a nih hunah chuan man man leh awlsam takin engkim a tih theih tawh dawn a ni, a ti.

Bungraw chawk luhna kawngah Pu Lal Thanzara chuan Indo-Myanmar trade chungchang pawh tarlangin Myanmar ram chhunga kawngpuite tha zawka cheibawl anih theih nan chak taka hmalak mek anih thu sawiin, Mizoram State Flagship Programme NLUP, mirethei khai chhuahna tur kalpui mekah dik tak leh hlawhtling taka kalpui anih theih nan YMA member te chu kawng dik kawhhmuhtu leh kaihruaitu ni turin a sawm a, power lama kan intodelh theihna tur leh heta tanga Mizoram-in sum a hmuh let theihna turin lui liante khuah mek leh khuah tura hmalak mek anih thu a tarlang bawk.

Mizorama hnam dang mi, min chenchilhtu mi 200000 vel englai pawha awm mekte hi ringtu a siam hi kan mawh a ni a, Mizoram an chhuahsan hnuah chanchintha hriltu ropui tak an ni thei a ni, a ti bawk.

Pu Lal Thanzara hian Zotlang Branch YMA Golden Jubilee lawmpuinan hian Computer set 1 leh PA set 1 a hlan a, Golden Jubilee Souvenir a tlangzarh nghal a ni.

Parliamentary Secretary hian vawiin khan Champhai Zotlanga Mangkhaia Hall, Rs. 28,70,810 senga sak chu a hawng nghal a ni.