Vawiin khan Govt Chanmari Middle School kum 50 tlin lawmna Parliamentary Secretary Pu Lal Thanzara’n a hmanpui.

Pu Lal Thanzara chuan Mizorama zirna bultantu chu kohhran a nih miau avangin Mizoramah chuan zirna leh Kristianna hi a then hran theihloh tiin sap Missionary ten zirna bul an tan dan leh hma a sawn chhoh zel dan a sawi a. Tun dinhmuna sorkarin zirna kawnga hma a lakdan te tarlangin zirna hmel tihdanglam beiseia din Educations Reform Commission rawtna zulzuia hmalak mek a nih thu te, tunlai Technology thang chak tak naupang ten an umphak theihna turin Centre School 280 ah Computer 5 hmanga zirtirna kalpui mek anih thu te leh hemi avanga Computer thiam tura beisei zat chu zirlai 21,469 zet an nih thu a sawi a. Phai lam khawpui chauha awm tura ngaih thin IIMC leh NIT te Mizoram chhung ngeiah a awm tak thu leh Polytechnic Institution Serchhip leh Saiha a neih tura hmalak a nih thu te, Sainik School Chhingchhip a dah tura hma chak taka lak mek a nih thu te a tarlang bawk. Pu Lal Thanzara chuan Govt Chanmari Middle School in kum 50 a tling ta chu lawmawm a tih thu sawiin he sikul chhuak mi chhuanawm tak tak an awm a ni, a ti.

Jubili lawmna inkhawm hi VEC Chairman Pu T. Lalhluna’n a kaihruai a, tlaiah Jubili ruai an kilho nghal a ni.