Nimin chawhnu khan Health Minister Pu Lal Thanzara, bialtu MLA ni bawk chuan Chanmari West veng ah Community Hall sak hna tanna atan lungphum a phum a. Chanmari West Veng Community Hall hi North Eastern Council (NEC) leh Mizoram sawrkar ten 90:10 a an inthawhtawm sum cheng nuai 475.28 in sak a ni dawn a ni.
Health Minister Pu Lal Thanzara chuan vengchhung hmun tam takah community Hall, multipurpose Hall leh mipui vantlang punkhawmna tur bakah infiamna hmunhma din mek a nih thu sawiin chung hmalakna te chu sawrkar in thalaite tana khawvel thar siamsak a lo tiam tawhna tihpuitlin mek tam tak zinga pakhat a ni, a ti a. Vengchhung mipuite pawhin tunhma aia vantlang hmunhma te enkawlthat an intihhmuh chho zel chu hmasawnna lawmawm tak a nih thu a tarlang a. Vantlang hmuhma humhalh leh vawn thianghlim hi kan zaa mawhphurhna a ni a ti.
Chanmari West Veng Community Hall lungphum phumna pual hian Chanmari West YMA Zawlbuk ah vantlang inkhawm neih a ni a. He hunah hian Hall sak Lungphum phumtu, Health Minister Pu Lal Thanzara chuan Chanmari West YMA Zawlbuk sak chhunzawmna leh Chanmari West High School cheithatna atan ama sum fai tam tham tak khawtlang hruaitute hnenah a hlan a.
PWD Official lam in Community Hall sakhna kalpui dan tur sawifiahna hun hmang lehin technical report an pek dan chuan Community Hall at Chanmari West hi chhawng 5 a sak tur a ni a. Building pumpui zau zawng hi 1419.48 sqm niin he hall-ah hian Badminton khelhna, Indoor Games Hall, Multipurpose Hall, Garage/Parking leh tuidahkhawlna te siam a ni ang.
