Pu Lal Thanzara, Minister of State chuan vawiin khan Information & Public Relations Department, Mizoram Art Development Society (MADS) leh Mizo Photographers’ Society tangkawpin Chapchar Kut 2014 pual Painting & Photo Exhibition Vanapa Hall-a an buatsaih chu khuallian niin a hawng.

Hawnna inkhawmah hian Pu Lal Thanzara chuan hmasawnna kawng hrang hrang kan zawh mekah hian Fine Arts lamah pawh hmasawnna chak tak hmuh tur a awm mek hi thil chhinchhiah tlak tak a tling a ni a ti. Lemziak atangte hian thangthar zawkten pipu nunhlui an mitthla thei a ni. Photography-ah exhibition kan nei thei hi hmasawnna duhawm tak a niin eizawnna tlak anih thu sawiin thlalak lam tihmasawn nan pawh hian budget tharah hian ruahmanna siam theih nisela thil duhawm tak a ni ang Minister chuan a ti bawk.

Hawnna inkhawm hi Pu Jim K.Chozah, Director, I&PR-in a kaihruai a, Pu Laltanpuia, President, Mizoram Art Development Society leh Pu Lalsangzuala, President, Mizo Photographers Society-ten thusawina hun an hmang bawk. Kum kalta chhung khan lemziah tihhmasawn nan I&PR Department leh Mizoram Art Development Society tangkawp chuan Seminar-cum-Workshop, Children Painting Competition leh Exposure Tour-te an lo buatsaih tawh a ni. Exhibition hian March ni 8 thleng a awh ang a, thlalak 60, lemziah 88 leh Sculpture 1 pholan a ni.