Pu Lal Thanzara, Health & Family Welfare Minister chuan vawiin khan Synod Hospital leh Pallium India tangkawp buatsaih Consultation on Opioids for Advanced Care in Pain and Palliative Medicine, Tourist Lodge a neih chu a hmanpui.

Pu Lal Thanzara chuan Synod Hospital in vawiin ah hetiang inrawn khawmna pawimawh tak an buatsaih chu lawmawm a tih thu sawiin, hemi chungchanga mithiam Dr. M.R. Rajagopal, Chairman, Pallium India lokal theih chu lawmawm tiin, vawiina inrawn khawmna hian damlo te enkawlna ah thui takin a kaihhruai theih a beisei thu a sawi a. Minister chuan kan hriat theuh angin Palliative Care chu thih hlauhawm dinhmuna ding mek tawh damlo te leh an chhung ten, nun nuam leh hahdam zawka an hman theih nana an natna tawrh chhawk zangkhai leh a zual zel tur ven dan kawng zawn te, an taksa natna mai piah lamah an rilru leh thlarau lama tawrhna awm thei te enkawl hi a ni, tiin mipuite hi hemi kawnga inzirtirna leh hriatzauna an neih that a tul thu a sawi. Civil Hospital, Aizawlah chuan kum 2006 atang khan cancer damlote tan hetiang Palliative Services hi tan tawh a nih thu te leh tunah chuan Mizoram State Cancer Institute, Zemabawkah Palliative Care Unit changtlung tak a awm tawh thu Minister chuan sawiin damlo in register te hnenah Morphine a thlawha pek te a nih thu a sawi a, District Hospital tinah Palliative Care Clinic kum 2 chhung hian tan tura ruahman mek a nih thu te leh MSCI chu training pekna hmun atan ruahman a nih tur thu te a sawi bawk a ni.

Vawiin inrawn khawmnaah hian Dr. M.R. Rajagopal, Founder & Chairman, Pallium India chuan Palliative Care chungchang sawiin Dr. Jerry L. Pautu, Consultant, MSCI leh Lalsawma Pachuau, Joint Director, FDA ten Opioid chungchang sawina hun an hmang a. February 2016 atang khan Pain & Palliative Care Project chu Synod Hospital ah hian tan a ni a, tunah hian Doctor 1 leh Nurse 3 ten training chhuak tawhin he project hi an enkawl mek a ni.