Lynchpin, Guwahati leh Zalen Chanchinbu, Aizawl te tangkawpa buatsaih ni 2 awh tur ‘EDUFEST 2013’ chu vawiin khan Aijal Club kawtah Parliamentary Secretary to Chief Minister Pu Lal Thanzara’n a hawng a. EduFest hi Aizawl-ah vawi 8 neih tawh a ni, kumin hian ramchhung leh ram pawn atangin zirna in chi hrang hrang 103 an rawn tel a ni.

Edufest 2013 hawnna inkhawm Zalen Editor Pu Vanlalrema Vantawl kaihhruaiah Khuallian Pu Lal Thanzara chuan ram hmasawnnain a ken tel, zirna in changkang tak tak ten kan ram atanga zirlaite an rawn beisei duhna chu a lawmawm hle a ni, a ti. Ramchhung hmun hrang hrangah hetiang eizawnna lama Career Awareness Programme hi neih a ni fo a, school naupangte tan subject leh career hrang hrang an hriat ngai loh hmelhriatna leh duhtawka zirchianna hun siam sak hian, an hmalam hun tur ngaihtuah nachang hriatna leh tumruhna nasa zawk a pe thei a ni, a ti a. Mizote chu ziak leh chhiar thiam tamna state ni mahse thiamna tak tak leh zirna sang zawk kan pha lo fo thin a, hetianga kan ramchhungah ngei zirlaite tan admission awlsam tak leh dik taka an tih theihna tura ruahmanna felfai tak siam thin an awm hi, zirlai leh nu leh pa a tam thei ang berin pan nachang hria se a duh thu a sawi a ni. Mizote hmasawnna bul ber chu Chanchin Tha a nih thu sawiin Pu Lal Thanzara chuan Sap missionary ten A AW B min siam sak lai tho khan Vai tawng hawrawp hmanga Mizo tawng ziah dan tur buapui tho a ni a, amaherawhchu Sap hovina Mizo hawrawp min siam sak chu kan hmang hlen ta zawk a, hei hi Mizote lehkha zirna lamah leh ziak leh chhiar lama min puitu lian tak a ni, a ti bawk.

EduFest hi vawi 11 lai buatsaih ni tawh mahse, Aizawl-ah tak chuan kumin hi a vawi 8-na a ni a. Kum hmasa lamah te pawh Mizo zirlai, naupang leh thalaiten zirna in sang zawkah awlsam taka admission an hmuh phah mai bakah hna te pawh an hmuh phah a ni. EduFest buatsaihtu ten Mizo zirlaiten an hlutsak em avangin Aizawl-ah kum tin buatsaih an tum thu te, Mizo thalaite chu EduFest avanga ramchhung leh pawnah hna an hmuh nual tawh thu te an sawi bawk a. EduFest 2013-ah hian kumdang aia tam zirna in 103 lai rawn telin, Medical, Engineering, Pharmacy, Technology, Hotel Management, Business Management, Polytechnic, IT leh Tourism lampang tui te tan zirna in hrang hrang an rawn in phochhuak a ni.