Govt. Middle School, Hunthar Aizawl-in Silver Jubilee lawmna Programme vawiina an neih chu Health Minister Pu Lal Thanzara, Bialtu MLA ni bawk chuan a hmanpui a, Silver Jubilee Monument hawnna a nei nghal .Pu Lalmuanpuia, Leader AMC leh veng chhung hruaitu pawimawh tak tak te an tel kim hle.
Pu Lal Thanzara chuan Pathian hruaina in Silver Jubilee tluang taka Govt. Middle School, Hunthar vengin an hmang thei chu a lawmpui thu sawiin a tir atanga he school lo din tu Pu Lalrova(L) leh hruaitu dang ten hmathlir zau tak an lo neihna a zarah he School in vawiin Silver Jubilee in lo thleng thei a ni a ti a. Ram tan leh vengchhung tana mi chhenfakawm chherchhuak zel tura hma la turin tuna mawhphurhna chelhmektute leh zirna lama naupang te kaihruaitu chu a chah ani. Mizofate hi kan vannei em em a, hawrawp engmah la nei lo, vai tawng phung hawrawp kan tih mai zir hmabak kan nih laiin tuipuiral atangin Missionary ten min rawn zawng chhuak a, ziak leh chhiarna tur saptawng thumal ang A,B,C hawrawp ang chi lehkha min lo zirtir chu lawmawm a tih leh tunah phei chuan India ramah ziak leh chhiar kawngah State thiam ber pawlah kan in hlangkai tawh a ni a ti.
Sorkar hian zirna lamah hmasawn turin tan nasa takin tan a lak dan sawiin Khuallian Pu Lal Thanzara chuan tun hnaiah hian Middle School-ah Science leh Mathematics zirtir tura mi 30 chuang mithiam lak tan a nih thu leh TATA Company te nen tangrualin tun session ah hian Football zirna a siam tharte, kan la neih ngai loh Education Centre sakna tur cheng vaibelchhe riat chuang senga nei turin sorkar in hmalakna a kalpui mek a ni ati a. Youth Commission kaltlangin thalai ten eizawnna an neih theihna turin training tur mi 3600 chuang State pawnah thawn chhuah an ni tawh a, State chhungah leh pawnah thalai engemawzat training pek an ni tawh bawk a, Tunhnai ah Youth Commission kaltlang hian Mizo tlangval mi 300 sipai tang turin lak mek an nih thu a sawi bawk.
Hunthar Veng leh a chhehvel siamthat nan leh hmasawn nan ruahhmanna hrang hrang siam niin chung zingah chuan Airport panna kawng pawimawh tak National Highway enkawl lai mek leitlahniam chu tun fur tui tlak hma ngeia siam that tum a nih thu leh hemi atan cheng nuai sawm ruahman tawh a niin cheng nuaih sawmli pakua senga tui luankawr leh hmun dangte siam tum anih bawk thu Minister chuan sawiin Health & Family Welfare hmalakna in vengchhungah hriselna leh thianghlimna kawnga hmasawn nan theih tawp chhuah an tum thu a sawi.
Pu Lal Thanzara hianGovt.Middle School, Hunthar Aizawl-in Silver Jubilee lawmna lawmpui nan Rs.50000 pe in Computer set 1 vawiin hian a pe a ni.
Khual zahawm Pu Lalmuanpuia,Leader AMC chuan Silver Jubilee puala Souvenir a tlangzarh a, Zofate min siamthatu chu Kristian kan nihna hi a niin kan hmalam hunah pawh Pathian zarah kawl a eng zel ang a ti a. Theihtawp chhuaha School naupangte chu ringtu tha an niha, Ram leh Hnam tana mi tangkai tak chher chhuak zel turin sikul hotute chu a chah a ni.
He Programme hi Pu Lianthangpuia, Headmaster in a kaihruai a, Pu Lalthansiama Ngente Organising Secretary in report a pe a, Pu C.Laitanga, Founder Secretary Managing Board, Pu Lalhmangaiha Renthlei, Chairman Local Council leh Pu Rohmingthanga YMA President te chuan thu an sawi bawk. Programme hlimawm taka hman niin tlai lamah Silver Jubili lawm na ruai theh ani.
