Mizoram College of Nursing chuan vawiin chawhma dar 11 khan Falkawn-a Referral Hospital-ah 27th Graduation & Lamp Lighting Ceremony 2010 – 2014 Batch an hmang a.Khuallian Pu Lal Thanzara, Health Minister chuan nurse zirchhuak thar te chu an thutiam leh an motto ah ding nghet tlat tur in a fuih.
Mizoram College of Nursing atangin mi 170 lai main B.Sc Nursing an chhuak tawh chu a lawmawm in tunah 6th Batch B.Sc Nursing mi 30 ten an zirchhuak leh chu a lawmpui thu sawiin Health Minister Pu Lal Thanzara chuan kum 4 chhung zet zir ngai anih avangin thil namai lo tak a ni a, chuvang chuan an thiamna te hmang tangkai ngei tur leh hmalam hun eng takin a hmuak a ni tih beisei tlat tura chahin duhsakna a hlan a ni.
Florence Nightingale in Crimean War a sipai hliam tuarte enkawla, sathau khawnvar nen zanthim pawh sawiloa a thawhrimna chuan khawvel dengchhuakin tun thlengin eng chhit hi Nursing represent nan hman a lo ni ta tih sawiin Health Minister chuan inpumpekna nen thawk tura chahin Pathian leh vawiina kalkawmte hmaa an intiamna chu Nurse hna ngaihsan awm zia phochhuaktu a ni tih hria a, rinawmna thutiam chu vawng reng turin a chah a, Chutiang taka thawk thinte chu an tluangin Pathian pawhin mal a sawm ngei thin tiin Mizoram sorkar hnuaiah hna thar siam zung zungte a harsat avangin state pawn leh foreign thleng pawha hnathawh inhuam turin a hrilh a. Mizo Nurse ten fak an hlawhin Hospital a thawk turin an duh hle thin a, chuvang chuan tuna an zirah duhtawk mai lova thiam belh zel tur leh zir zel a hmasawn zel turin a ngen bawk a ni.
College building pawh tha tak din a lo ni ta a, duhthusam ni rih lo mahse, post create harsa viau chung pawn post thar pawh fill up a ni a. Hostel building pawh mi 200 leng tur, block hnih sak hna pawh tan mek a ni tih sawiin Health Minister chuan nurse hnaruak hnawhkhah dawn pawhin, staff nurse ngat phei chu dil thei an tam tawh hle a. Competition a sang tawh a, chuvang chuan tuna la zir mekte pawh taima taka thiamna tak tak nei tura zir turin a chah a. Sorkar in Medical College din nan Falkawn chu a rintlak em tih tunah a zir mek thu leh harsatna a lo awm anih pawh in a sut kian dan tur pawh ngaihtuah zel a tum ani tiin kum thar ah chuan Civil Hospital atanga department engemaw zat sawn anih tur thu leh hemi in a kaihhnawih tur Bus leh dawr etc te pawh ngaihtuah zel sorkar in a tum thu a sawi bawk a ni.
Khualzahawm Pu K.S. Thanga,Parliamentary Secretary pawh in thu sawiin bialtu MLA anihna anga hma a lak pui na leh mamawh la awm te sawiin nurse kalchhuak tur te chu damlo an enkawl na ah taimakna leh rinawmna vawng tlat tur in a ngen a ni.
Vawiina Lamp Lighting Ceremony hmanna ah hian Health Departmenta hotu te leh zirlai nu leh pa te n an hman pui a ni.
