Amoii & JVa Duet Exhibition of Art, Art Novelty Gallery, Chaltlang Venglai a buatsaih chu Information & Public Relations Department Minister Pu Lal Thanzara'n vawiin khan a hawng.

Hawnna inkhawmah hian Pu Lal Thanzara chuan Art chu khawvel a hnam zia rang hrang hrang phochhuaktu leh huikhawmthu a nih thu sawiin, Art tihhmasawnna tura I&PR dept. te leh Artist te hmalakna chu lawmawm a tih thu a sawi a. Mahni sum senga Duet leh Solo Exhibition buatsaih a ni thin chu a buatsaihtu te fakawm a tih thu leh an tuina tilang chiangtu a nih thu a sawi. Minister chuan lemziak leh lemker chu ngawi renga thu tam tak sawi thei a nih thu sawiin, hei hi artist te hming dailova nung renga siamtu a ni a ti.

Vawiin duet exhibition of art hawnna inkhawm hi Pi Lallianpuii, Jt.Director, I&PR in a kaihruai a. Exhibition buatsaihtu te hi Lalhming Mawii(Amoii) leh JV Lianthansanga (JVa) te an ni a, 29th November atanga 6th December, 2017 thleng exhibition hi neih a ni ang.