Vawiin khan Health & Family Welfare Minister Pu Lal Thanzara chuan Doctor-te intelkhawmna pawl Indian Medical Association, Mizoram Chapter ten State Referral Hospital Falkawn bula IMA Multipurpose Centre an sak tur lungphum a phum.

Pu Lal Thanzara chuan IMA in Multipurpose Centre an sak tum chu doctor tan chauh nilo a mamawhtu apiangte hman thei tura ruahman an tum chu tha a tih thu a sawi a. He Multipurpose Centre chu PPP Mode a sak tumna awm nia a hriat thu chu tha a tih sawiin, hemi atan hian Sawrkar pawhin a theih ang angin tanpui dan tur a kawng a zawng zel ang a, mahse a sakna turah Sawrkar-ah innghah pumhlum erawh a fuhloh thu te, mahni lam atanga kawng zawnga hma la turin kalkhawmte a chah a ni. Minister hian IMA senior member ten hun hmasa lama Mizoram mipui hriselna tihmasawn tura an lo inpekna leh thawhrimna te chu Sawrkarin a hriat reng thu sawiin, an chungah lawmthu a sawi a.

Sawrkar in Medical College neih tumin, a hlawhtinna atan theihtawp chhuahin hma a lak mek th sawiin Health Minister chuan tunhnai ah RIMS, Medical College Principal lo ni tawh Dr. L. Fimate chu MIMER Principal atan sawmchhuah niin, a hna pawh a zawm tawh thu te, Medical college a thawktu tur post 629 chuang lakna tur pawh Sawrkarin phalna a pek tawh thu a sawi a. Heng post zingah a pawimawh zual bik zirtirtu (Professor leh a hnuai lam) leh mithiam dangte chak taka lak an nih thei nan Sawrkarin a bikin Single Window Clearance ruahmanna a buatsaih thu a sawi a. Medical College chu Health Department chauhin a tihhlawhtlin thei loh avangin hemi atana mawhphurna pawimawh nei department – PHE, P&E leh PWD leh adangte nen theihtawp chhuahin tih tak zeta thawhho a ngaih thu a sawi bawk a ni.

Pu Lal Thanzara chuan Medical Council of India (MCI) in MIMER an tlawhna report chungchang social media-a tunhnaia thehdarh chu hriatsual thil awm nia a lan thu sawiin, Inspection Team in chik taka an enfiah ngei thu leh, heng Inspection Team hian Report erawh an la thehluh loh mai bakah, an Report hi Confidential a nih thu a sawi a. Health Minister chuan Medical College hlawhtlinna atan beiseina sang tak nen hma lak a nih mek thu sawiin, tuna MCI Inspection Team in report an pek turah pawh beiseina thui tak kan nghat a ni, a ti a. Medical College chungchangah hian IMA member-te pawh an ngaituahna sengin Sawrkar finchhuahpui turin a sawm bawk a ni.

IMA House Lungphum phumna programme hi Dr. Vanlalruata Ralte, President IMA Mizoram State Branch in kaihruaiin Dr. B. Thangdailova, Convenor; Dr. K.L Remsanga, Secretary, IMA House Sub-Committee leh Dr. John Zohmingthanga, Honorary Secretary, IMA Mizoram State Branch ten thusawiin IMA Multipurpose sak dan ruahmanna leh thil tum te an sawi a ni.

IMA Multipurpose Centre hi chawng 6 a sak tum niin hetah hian mamawh hrang hrang Conference Hall, thlen in leh a tul dangte dah tum a ni.

IMA hi India ramah doctor te intelkhawmna pawl lian ber niin member 2,15,000 vel an awm mek a, Mizoram pawh member 700 chuang an awm mek a ni.