Vawiin zing dar 10.00 khan Mizo Academy of Letters (MAL leh Sahitya Akademi leh NECOL, Agartala te tangrual chuan MBSE Hall-ah ni khat awh tur Ralte Tawng Zirhona leh Mizo hlate leh thawnthute Bengali tawnga lehlin lehkhabu ‘Mizo Gan, Adhunik Kabita O Lokakatha’ tlangzarhna inkhawm an buatsaih a; he hun hi Parliamentary Secretary Pu Lal Thanzara chuan a hmanpui a ni.

Pu Lal Thanzara chuan, “Mizote hi chi bil inpawlhsawp tak kan ni a, mahse, Mizo hnamah kan luangkhawm a, lungrual takin kan chengho mek a ni. Chuvang chuan, chi bil anga inlakhran duhna thinlung neitute leh inlak hran tuma tan la mektute pawhin kan thahnemngaihnate kan bansan ka duh tak meuh a. Mizo nihnaah hian lungawi takin kana wm mai tur a ni. Tun hnaia Ralte tawng thi mai tur humhalhna atana Ralte tawng Bible kan neihte pawh hi museum-ah te dah ni se; hemi lama a sulsutute hian Mizo hnam atanga inlakhran duhna rilru an pu lo tih pawh kan hriatchian a ngai a ni” a ti.

Pu Lal Thanzara chuan, “Literature hi hnam hmasawnnain a thlen chin leh a ropuina tehfung pawimawh tak a ni a; hemi kawngah hian Mizote hian hmabak kan la ngah em em a ni. Kan thu leh hlate hnam dangte chhiar theih tura chhawpchhuah kawngah pawh tan kan lak a pawimawh a. Thu leh hlaa India ram puipate zinga mi Rabindranath Tagore-a tawng – Bengali – ngeia kan Mizo hla leh thawnthute lehlin a, lehkhabua tihchhuah a lo ni ta hi mel-lung pawimawh tak a ni a; rim thaka thawktu zawng zawngte chungah lawmthu ka sawi a ni” a ti bawk.

Pu Angshuman Kar, Regional Secretary, Sahitya Akademi pawhin thu sawiin, “Kan ram Constitution leh dan dangtea ziahluh ve loh leh humhalh loh tawng thi mek tam tak kan nei a; chungte chu Sahitya Akademi hian humhalh turin theihtawp a chhuah mek zel a ni” a ti. Bengali tawnga Mizo hlate leh thawnthute lehlin a nih chungchangah Pu Angshuman Kar chuan, “Thu leh hla tawng danga lehlin a nih hian a original ang diak diak chuan a laimu kan phawkchhuak zo lo thin tih hi a chiang a; nimahsela, hetianga thu leh hla kan inthlengtawnna hian inpumkhatna te, inhriatthiam tawnnate nasa takin a thlen thin a. Vawiina kan lehkhabu tihchhuah tak pawh hi Bengali tawng hmangtute zingah hralh a tla hle turah kan ngai a ni” a ti.

He inkhawm hi MAL President Pu Lalthangfala Sailo chuan a kaihruai a. Chawhnu lamah hun then hniha hmangin Ralte Tawng chungchang zirhona hun an hmang a; Mizoram University-a Mizo Department zirtirtute leh zirlaite bakah MAL member-te an tel a ni.