Vawiin khan Women’s Polytechnic, Durtlang chuan an Multipurpose Hall-ah zirlai tharte lawmna inkhawm an hmang a. Parliamentary Secretary to Chief Minister Pu Lal Thanzara chu khuallian niin a hmanpui a ni.

Pu Lal Thanzara chuan zirlai lut tharte chu theihtawp chhuaha lehkha zir tura fuihin mahni ke a dinga, chhungkua leh ram tana mi tangkai ni tura inbuatsaih turin a fuih a. Rilru ngaihtuahna fim tak nen an hmalam hun thui tak thlir chunga he hmuna lokal an nih angin lehkhabu piah lamah kawngtinrenga mipuitling ni turin he Institution hian a chherchhuah ngei a beisei thu a sawi. Parliamentary Secretary chuan sorkar hmalakna thenkhat tarlangin Polytechnic pawh Saiha leh Serchhip District-ah dah anih theih nan chak taka hmalak a nih thu te; ram chhung zirna in tha NIT leh IIMC te Mizo te banphakah dah a nih thu leh kuthnawthawk leh loneitu te khaichhuahna tur policy, NLUP kalpui mek a nih thu te a sawi a. Corruption chungchang pawh sawilangin Pu Lal Thanzara chuan mipui aiawh tura thlan leh sorkar hnathawkte pawh eirukna leh hlemhletnaah an fihlim theihna turin anmahni venga thlithlai reng tur Ethics Committee din a ni, a ti bawk.

Women’s Polytechnic, Aizawl hi September ni 7, 1998 ah din niin Discipline pali-Modern Office Practice, Electronics &Telecommunication Engineering, Garment Technology leh Beauty Culture &Cosmetology te a zir theih a. Tunah hian zirtirtu 25 bakah Staff dang 43 an thawk mek a ni. Sorkar office pawimawh hrang hrangah an Institution chhuak mi engemawzatin training an nei mek a, Mizoram pawnah mi 24 ten Women Polytechnic, Aizawl kaltlang hian hna an hmu tawh nghe nghe.

Freshers pual inkhawmah hian Women’s Polytechnic Principal Pu FVL Biakchhawna’n zirlaite fuihna thu a sawi a, Women’s Polytechnic Aizawla din a nih dan leh tuna an dinhmun tlangpui a sawi a. Student’s Union General Secretary Lalhmangaihtluangi Fanai chuan report a pe bawk.